|
سیاسی کردنی قەتڵی نامووسی
هەڵوێست
پاش کوژرانی ژنێک بە ناوی مەریەم سادقی ناسراو بە
یەڵدا بەدەستی مێردەکەی و ڕاگەیەنەریی بوونی ئەو
جەنایەتە، ژمارێک لە خوێنەرانی
هەڵوێست لە پێوەندیەکانیاندا ئەو پرسیارەیان
هێناوەتە ئاراوە کە چۆنە هەڵوێست کە هەمیشە لە
ئاست رووداوەکانی کوردستان و بەتایبەت پێوەندیدار
بە رۆژهەڵاتی کوردستانەوە بێدەنگ نابێ، ئەمجارە
تەنانەت خەبەرەکەشی بڵاو نەکردوەتەوە. گەرچی
هەڵوێست لە کاتی ئەو رووداوەوە تازە نەکراوەتەوە،
بەڵام رەخنەی خوێنەران بەچێگە دەزانێ، دیارە بەو
تێبینییەوە کە روانگەی هەڵوێست لەگەڵ ئەو
فەزایەیە کە هاتبوە ئاراوە جیاوازە. بەم شێوەیە:
ئەو
جەنایەتە
لە یەکێک لە ناوەندەکانی جیگیر بوونی
بنەماڵەی سەر بە حیزبی کۆمەڵەی کوردستان رویدا،
کە بەشێوەیەکی بەرین و چاوەروان نەکراو، دەنگی
داوەتەوە و بە ڕادەیەکی زۆر ئەندامانی کۆن و نوێی
حیزبەکانی رۆژهەڵات و چەند ناوەندێکی مەدەنی و
چالاکانی بوارەکانی جۆربەجۆر هەڵوێستیان گرتوە.
دیار ئەگەر دەڵیین چاوەروان نەکراو، بەو مەبەستەیە
،ئەگەر ئەم کوژرانە دەچێتە بواری قەتڵی
نامووسییەوە، خۆ رۆژ نییە لە کوردستان یا لە
دەروەی کوردستان، عەقڵیتی پیاو سالاری کورد دەستی
بە خوێنی ژنێک سووڕ نەبێت. ئەگەر کەیسی دۆعای
لێبەدەر بکەین کە رووداوێکی دڵتەزین و تایبەت بوو،
بەڕاستی کەی تا ئێستا لە ئاست قەتڵی نامووسی
چالاکانی ئێمە ئاوا هاتوونەتە مەیدان؟ مەگەر
حەتووی پێشتر لە وڵاتی پێشکەوتووی ئاڵمان،
"باوکێک" کچە ١٣-١٤ ساڵەکەی خۆی نەدایە بە گوللە و
کیانی سەند؟ ئەرێ ئەو هەموو "داکۆکیکارانەی مافی
ژن" لە کوێ بوون؟
ئەو پێشەکییە بۆ ئەوەیە بچینە ناو باسێکەوە کە
بەداخەوە زۆرتر لەوە داکۆکی و دیفاع لە مافی ژن و
هاواری بێدەرەتانی ژن بێت، سیاسی و ڕەقابەتی
حیزبییە. هەر لەنێو ئەو کەسانەی کە ئەمڕۆ
بەمەبەستی تایبەت و بۆ کوتانی رەقیبێکی مەیدانی
سیاسەت( ئەویش لە نێوان حیزبەکانی ئوردووگانشینی
بێعەمەل دا) هاواری مافی ژن دەکەن و بۆ کوژرانی
یەلدا فرمێسک دەرێژن، خۆیان تا بنا گوێ پیاو
سالارن و ژن بە هیچ حیساب ناکەن. دیارە مەبەست
هەموو ئەو کەسانە نییە کە دژی کوژرانی مەریەم
وەدەنگ هاتوون و لە نێویاندا ژمارێک تێکۆشەری
بواری ژن هەن کە کارنامەی داکۆکی کردنی مافی
ژنیان روونە. بەڵام هەر ئەم کەسانەش بۆ ئەوەی
هاواری ڕاستبێژانە و عەقلانیی ئەوان تێکەڵ بە
هاواری درۆزنانە و سیاسیی هێندێک هەلپەرست نەبێت،
دەبوا ریزی خۆیان لەو پیاوسالارانە جیا بکردایەوە.
هەر لە رۆژی یەکەمی بڵاو بوونەوەی ئەو خەبەرە ،
چەشنێک فەزاسازی لە لایەن هێندێک ماڵپەڕەوە کە
دژایەتی کوێریان لەگەڵ کۆمەلە و ناوی کۆمەڵە
نەشاردوەتەوە دەستی پێکرد. (بۆ ئەوان فەرق ناکات
کێ خاوەنداریی لە ناوی کۆمەڵە دەکات، چوون ئەوان
ئەو ناوە بە نوینگەی چەپ و یەکسانیخوازیی دەناسن و
مەبەستیان کوتانی ئەو فیکر و رێبازەیە). پاشان
وەها فەزایەک لە دونیای مەجازیی ئەوانەدا ساز کرا،
کە تەنانەت یەک دوو کەسی خاوەن ئەزموونیش ،شوینی
کەوتن و کەوتنە هەڵوێست ێکەوە کە ڵێیان چاوەروان
نەدەکرا.
لە بەرانبەردا حیزبی کۆمەڵە و لایەنگرانیشی بە
شێوەیەکی سیاسی کەوتنە دیفاع کردن لە خۆ و لەباتی
ئەوەی شەفاف و روون ئەسڵی رووداوەکە بە ئاگاداریی
ڕای گشتی بگەیەنن، کەوتنە دووفاقی قسەکردن و
"ئاتۆ"یان دایە دەستی پیاو سالاران تا خۆیان وەک
مودافعی مافی ژن بناسێنن. جێ باسە کە لێرەدا حیزبی
کۆمەڵە نیشانیدا کە توانای هەڵسەکەوتیکی لۆژیکانە
و شەفافی لەئاست رووداوێکی کۆمەڵایەتی کەلە
دەروونیدا روو دەدا نییە.
ئەگەر چاو لە کێشەکە بکەین دەبینین کە رووداوی لەو
چەشنە( ئێمە فەرزمان لەسەر ئەوەیە کە کوشتنی یەڵدا
قەتڵی نامووسی بوە) دتوانێت لە هەموو شوێنێک روو
بدات و بە گرفت و دواکەوتوویی کۆمەڵایەتی دێتە
حیساب. واتا بەهیچ شێوەیەک ناچتە بواری قەتڵی
سیاسی و نابێ سیاسی لەئاستیدا سیاسی هەڵوێست
بگرین. بۆیە هێرش کردنە سەر حیزبی کۆمەڵە بەخاتر
ئەوە ئەندام یا پێشمەرگەیەکی تووشی قەتڵ هاتوە،
نابەجێ یە. چوونکە یەکەم چە قاتڵ و چ کوژراو،
هەموو مانگێک نابێ چوونەتە ریزی ئەو رێکخراوەوە.
بێگومان کێشەی بنەماڵەیی ئەو دووکەسە ریشەدار تر
لە یەک دوومانگ بوە. جیا لەوەش قەتڵ و کوشتنی
کەسێکی نزیک، هەمیشە بەهۆی جنوونی ئانی دێتە
ئاراوە و دوور نییە پاش ماوەیەکی کورت قاتڵ لە
کردەوەکەی خۆی پەشیمان بێتەوە. بۆیە تەنیا خۆی
بەرپرسیارە لە کردەوەکەیدا. ئەوەی بۆ حیزبەکە
دەمێنێتەوە هەڵسوکەوتی شەفافە.
کەس نەزانێ، خوێنەرانی بەردەوامی هەڵوێست دەزانن
کە ماڵپەڕی هەڵوێست لە ئاست رێباز و پراتیکی حیزبی
کۆمەڵە و بەتایبەت سکرتێرەکەی، هەڵوێستێکی
رەخنەگرانەی هەیە و نووسەرانی ماڵپەڕەکەمان هەمیشە
را و نەزەری خۆیان لە سەر ئەو حیزبە و تەنانەت
سکرتێرەکەی ڕاشکاوانە دەربڕیوە و لەسەر هەڵوێست
بڵاو بوەتەوە. کەوابوو، ئەم دەقە بەهیچ شێوەیەک
ناچێتە بواری داکۆکی کردن لەو حیزبە . هاوکات
هەڵوێست بەپێی رێباز و کردەوەی تا ئیستای و
پرەنسیپە ڕاگەیەندراوەکانی خۆی بە داکۆکیکاری مافی
ژن دەزانێ و لەم بوارەدا ئەوەندە بۆی کرابێ و
بڕستی بوە کۆتایی نەکردوە. هەر بۆیەش لە کەیسی
یەڵدادا بێگومان وەک هەمیشە ئەو کوژرانە مەحکووم
دەکات. دیارە بەبێ ئەوە بەچاوێکی سیاسی و بۆ
کوتانی حیزبێکی سیاسی بڕوانێتە کێشەکە. چوونکە
ئێمە تا ئێستە هیچ بەڵگەیەکمان نەدیتوە کە باس
لەوە بکات کە ئەندام یا ناوەندێکی بڕیاردەری
حیزبی کۆمەڵە پێوەندیەکیان بەو قەتڵەوە بوە.
بۆیە ئێمە ڕادەوەستین تا روون بوونەوەی ئەسڵی
رووداوەکە و گەر لەو نێوانەدا دەرکەوێت کە ئەو
حیزبە یا ئورگانێکی بەهەر هۆیەک(وەک ئاگادار بون
لە مەبەستی قاتڵ و هیچ پێشگیریەکیان نەکردبێ، یا
هەر هۆیەکی دیکە) بەچەشنێک تاوانبار بزانرێن،
ئەوسا ڕاشکاوانە حێزبی کۆمەڵە بە شەریکی ئەو
جینایەتە دەزانین.
بۆ ناردنی کۆمێنت یا روانگه و
بۆچوونی خۆت لهسهر ئهم بابهته، لهم فۆرمه
کهلک وهرگره
|
