|
تەرمی شۆڕشگێر
لە سەر تەناف و دیسکۆ دانسی ژمارەیەک کورد!
شێرکۆ جیهانی
کاتێک شایی دادەبەستین
ڕیز دەگریم و دەست لە دەستین
کەچی سەیرە
خۆ شۆڕش دایکی هەموو شاییانە
دە پێم بڵێ بۆ چی تو خوا
هەر چەند جارێ دایدەبەستین
هەر کەس بە لایەک دا دەڕوا
ئەوە بەشێک لە شێعرێکی عەبدوڵڵا پەشیوە کە بە
دیتنی دیمەنی شایی و هەڵپەڕینی ژمارەیەک کورد بە
بۆنەی دووی ڕێبەندان و بۆنەکانی دیکە لە کاناڵە
کوردیەکان,
دەکەوێتە بیرم. دووی ڕێبەندانە و چەند کاناڵی
بە ناو سیاسی کوردی بەردەوام پڕۆپاگەندە بۆ ئەوە
دەکەن کە فڵانە ڕۆژ لە فڵانە شاری ئوروپایی و لە
فڵانە ساڵۆن هەڵپەڕکێ بەڕێوەیە! کچان ماتیک لە
دەمیان دەدەن و جوانترین جلوبەرگە کوردیەکانیان لە
بەر دەکەن یانیش هێندێکیان بە لە بەر کردنی مینی
ژۆپ و جلوبهرگی رۆژئاوایی دەچنە شایی و هێندێک
کەسیش بە عیشق و عیشق بازییەوە خەریک دەبن! بڵاو
بوونەوەی دیمەنی هەڵپەڕکێ و پڕۆپاگەندە بۆ شایی
دووی ڕێبەندان لە کاتێکدایە کە هێشتا تەرمی گەرمی
حوسێن خزری سارد نەبووەتەوە و تەنیا چەند ڕۆژ لە
شەهید بوونی تێپەڕ دەبێت. لە خۆم دەپرسم: ئایا
نەتەوەیەک کە ڕۆڵەکانی بەم شێوەیە لە سێدارە
درابێن و شینی نەتەوەیی هەبێت، دەکرێ دەسرەی چۆپی
و شایی هەڵبگرێت، تەنانەت ئەگەر بە بۆنەیەکی کۆنی
نەتەوەییش بێت؟! لە سێدارەدانی لاوانێک وەک حوسێن
خزری نموونەیەکە لەو تڕاژێدیە گەورانەی کە ئەگەر
بە سەر هەر نەتەوەیەکی وشیار و تینووی ئازادی دا
هاتبا، هەرگیز بە ئاسانی لە بەرامبەری دا
بێدەنگیان هەڵنەدەبژارد. دیارە لە هێندێک شوێنی
باشوور و باکوری کوردستان و ئوروپا ڕێپێوان کرا. (
لە گەڵ ئەوەشدا کە بۆ نەتەوەیەکی چەند میلیۆن
کەسی، بەشدار بوونی دە تا پازدە هەزار کەس لە
هەموو ئەو ڕێپێوانانە دا شتێکی زۆر نییە، بەڵام
دیسانیش مرۆڤ دەبێ نرخی پێبدات، چوونکە دڕک ئەگەر
چکۆڵەش بێت، دەتوانێ چاوی دێوەزمە ئازار بدات ).
بەڵام بەو حالەش وەرن ئەو پرسیارە لە خۆمان بکەین.
باشە چۆنە کە لە ڕۆژی جەژنی "نەورۆز" یان "سێزدە
بەدەر" دا بە سەدان هەزار کەس لە ماڵەکانیان دێنە
دەرێ و هەڵدەپەڕن؟ چۆنە لە ئوروپا، بۆ هەڵپەڕینی
"دووی ڕێبەندان" لە شارێکی وەک " ئۆرێبرۆ" یان "
یۆتۆبۆری" لە سوێد بە سەدان کچ و کوڕی جەوان کۆ
دەبنەوە و شایی دەگێڕن. بەڵام لە کاتی لە سێدارە
درانی لاوێکی وەک حوسێن خزری کە بە تاوانی بەرگری
کردن و خواستی ئازادی هەر بۆ ئەم خەڵکە و منداڵانی
داهاتووی ئەم نەتەوەیە لە سێدارە دراوە، تەنانەت
تەنیا چەند چرکەیەکیش وەخت دانانێن و ناڕەزایەتیەک
نیشان نادەن؟! لە سەرتاسەری ئوروپا تەنیا چەند
سەت کەس ڕێپێوانیان کردووە و ئەگەر وردیش ببینەوە
دەبینین کە لە زۆرینەی ئەو شارانەی کە "دووی
ڕێبەندان"ی لێ پیرۆز دەکرێت، بێدەنگی تەواو حاکم
بوو. نموونەی شاری " ئۆرێبرۆ"م هێناوە. باشە ئەو
لاوانهی کە لەوێ بۆ ماوەی چەندین کاتژمێر خۆیان
هەڵدەهاوێن و ڕەنگە ئالایەکی کوردستانیش بە
دەستهوه بگرن و لە پێش کامێڕا شووعاریش بدەن، بۆ
چی تەنانەت بۆ ماوەی دە خوولەک لە پارکێک یان
ساڵۆنێک کۆ نابنەوە تا ڕێز لە یادی ئەو شەهیدە
بگرن، یان لە دژی سیاسەتی ئێعدام و لە سێدارەدانی
هاوزمانەکانی خۆیان بە دەستی کۆماری ئیسلامی ئێران
ناڕەزایەتیەک دەرببڕن!؟ ئەگەر بە راستی بڕوایان بە
چەمکێکی نەتەوەیی هەیە و بۆ ڕێز گرتن لە ڕووداوێکی
خۆشی نەتەوەیی کۆبوونەوە، کەوابوو دەبێت بە بۆنەی
ڕووداوە تاڵ و ناخۆشەکانیشەوە ئامادەیی خۆیان
نیشان بدەن و قۆڵ هەڵماڵن، ئەگینا داپەڕین و
هەڵپەڕینیان بە بۆنەی نەتەوەیی لە چییە و مرۆڤ
دەتوانێ بڵێت کە ئەمە بۆنە نییە، بەڵکوو
بەهانەیەکە بۆ ساز کردنی دیسکۆیەک و بەس. هەر
چەندی بیری لێ دەکەمەوە نە تەنیا ناتوانم شانازی
بەو جۆرە بەرنامانە بکەم، بەڵکوو بە سووکایەتی و
بێ ڕێزێشیان دەزانم بە خەڵک و بە تایبەت ئەو
تێکۆشهرانهی کە هەر ئێستا بۆ جاری دوویەم لە
زیندانەکانی ڕۆژهەڵاتی کوردستان و ئێران دا
دەستیان بە مانگرتن لە خواردن کردووە و ڕووبەڕووی
شکەنجە و ئازار دەبنەوە!
ئێستا خەریکە بەو باوەڕە دەگەم، زۆربەی ئەوانەی
کە لە ئوروپایە بۆ فێستیوالەکان و ڕێوڕەسمەکانی
وەک دووی ڕێبەندان دەچن و ڕەنگە هێندێک جار
ساڵۆنەکانیش پڕ بکەنەوە، زۆرتر لە بەر خواردنەوە و
هەڵپەڕین دەچن نەک لە بەر هەستی بەرپرسیارەتی
نەتەوەیی. چوونکە ئەوەی کە زۆرتر لەو ڕێوڕەسمانەی
لە وێنەی دووی ڕێبەندان و چی و چی دا دەیبینین، خۆ
ڕازاندنەوەی کچان و ژنانە و نیشان دانی لهنجه و
لاو و لهشیانه. پیاوەکانیش زۆربەیان مەستی مەستن
! ئەوە زۆرتر لە ڕێوڕەسمی سەمای باڕ و کاباڕاکان
دەچێت کە هێندێک درووشم و سووخەنرانی دووپاتیشی لە
ناو دەخوێندرێتەوە و بەس! (دیسکۆیەکی کوردی !).
چونکە ئەگەر بە راستی مەسەلەی نەتەوایەتی مەترەح
بێت، هەر ئەو کەسانەی کە دەچنە شایی و جەژن و
فێستیوالەکان و دەستی یەکتر دەگرن و پڕ بە گەروو
هاواری خۆشیان لە لێ بەرز دەبێت، دەبا هەر ئەوانەش
لە دژی زوڵم و ستەمی دەوڵەتە داگیرکەرەکەیان
هەڵوێست بگرن و ناڕەزایەتی و ڕێپێوانێک وەڕی بخەن!
ناڵیم هیچیان بەشداری ناکەن، ڕەنگە ژمارەیەک لەو
کەسانە لە ڕێپێوانیش دا بووبن. بەڵام من باس لە
زۆرینە دەکەم نەک کەمینە. چوونکە هەموو کاتێک
ساڵۆنی هەڵپەڕین بە پڕتر دەبینم و ڕێپێوانەکانیش
لە دژی دەوڵەتی ئێران بە کزی و کەم هەژماری !!!
لە بەر دەرگەی ساڵۆنی مەراسیمات، ماشێنێکی زۆر بە
ڕیز دەبینی و خەڵکانێکی زۆریش لە ژوور و دەرەوەی
ساڵۆنەکەن، بەڵام پلاکارد بە دەستی بەر دەرگەی
سەفارەتەکانی ئێران لە ئوروپا، جاران ژمارەیان لە
پەنجەکانی قامکی مرۆڤیش کەمتر بووە ! ئەگەر بە
راستی بۆنەی نەتەوەیی مەترەح بێت، چ بۆنەیەک لە
دواترین تراژێدیەکانی کە بە سەرمان دێت گرینگتر!؟
تراژێدیەکی لە وێنەی ئێعدامی حوسێمی خزری! ئایا
ئەو ڕووداوە هەستی نەجووڵاندوون و بۆیان گرینگ
نەبووە کە وەها سادە بە پەنای دا تێپەڕ دەبن، یان
شایەدیش ئەو کەسانە هەر لە داهاتوو دا دەژین و
ڕووداوەکانی ئێستایان زۆر لە بەر چاو نییە؟
پرسیارێکی دیکە کە بە مێشکم دا دێت ئەوەیە:
ئایا زۆرینەی ئەو کوردە ڕۆژهەڵاتیانەی کە
دانیشتووی ئوردوگاکانی باشوور یان وڵاتانی
ئوروپایین، بە ئەندازەی ئەو خەڵکە ئەفغانیەشیان پێ
ناکرێت کە ماوەیەک لەمەو پێش و لە دژی سیاسەتی
ئێعدام هێرشیان کردە سەر سەفارەتی کۆماری ئیسلامی
ئێران لە کابول(ئەفغانستان) و ڕێپێوانێان ئەنجام
دا؟ ئەفغانیەکان وێنەی شەهیدانی کوردیان بە
دەستەوە بوو! وێنەی فەرزاد کەمانگەر و حوسێن خزری
و شیرین عەلەم هولو و ...هتد. دەنگی خۆیان هەڵبڕی
و ناڕەزایەتی و نەفرەتی خۆیان لە بەرامبەر
سیاسەتەکانی دەوڵەتی ئێران لە دژی کوردان و
ئەفغانیەکان نیشان دا، بە جۆرێک کە دەوڵەتی
ئێرانیان وەها تووڕە کردبوو کە داوای گرتنی
ئەفغانیەکانی لەو وڵاتە دەکرد و هەڕەشەی ئابووری
لە ئەفغانستان دەکرد. بەڵام زۆرینەی کوردە سیاسی
و ناسیاسیەکانی دانیشتووی ئوروپا، بە خۆیان و
بنەماڵەکەیان ئامادەن کە سەفەری دەریایی و ئاسمانی
بۆ ئەم وڵات و ئەو وڵات بکەن و لە ساڵۆنەکانیش بە
بۆنە یان باشترە بڵێم بە بەهانەی 2ی ڕێبەندان و
نەورۆز و ...هتد، بە خەرج کردنی کۆڵێک پووڵ و
دەعوەتی گۆرانیبێژان و چی و چی خۆ هەڵاوێن و خۆش
ڕابوێرن. بەڵام هەر ئەوان ڕەنجی هەڵینانەوەی
هەنگاوێکی کۆلێکتیوی جددی لە دژی قاتڵان و
داگیرکەرانی وڵاتەکەیان، کە بوونە هۆی ئاوارەیی و
دوورەوڵات بوونیان، هەڵناهێنن!
ئەگەر ویژدانێک هەبوایە، دەبوایە دووی ڕێبەندانی
ئەمساڵ جەژن نەگیرابا، یان لانی کەم بە شاییەوە
نەبوایە و تەنیا بە وتار و فیلم و دێکۆمێنت یادی
دووی ڕێبەندان کرابا. دەبوایە گۆرانی بێژانی کورد
لە جیاتی گۆرانی " مەملی مەمانی مەمۆ، ئی خۆمە و
نایدەم بە تۆ" سروودی شۆڕشگێریی و
ئازادیخوازانەیان بۆ یاد و بیرەوەری حوسێن خزری و
دواترین هەناسەکانی لەسێدارە دراوانی دیکە ئامادە
کردبایە و هێندیک تەلەڤیزیۆنی کوردیش شەرمیان لە
خۆیان کردبا و لە وەها کاتێکی هەستیار دا چی دیکە
دیسکۆ دانسی کوردیان وەڕێ نەخستبا.
ئەوە راستە مرۆڤ زاتەن گەرایشی بەرەو لەززەت و
خۆشی هەیە، بەڵام هەر شتێکیش کات و ساتی خۆی هەیە.
ئەو کەسەی ددانی دێشێت چۆن دەتوانێ شیرینی بخوات!؟
ئەگەر کەسێک تیری لە جەرگ دابیت چی، دەتوانێ سەما
بکات؟ یان شایەد ئەوانەی سەما دەکەن هیچ شتێکیان
بە خەیاڵ دا نایە. نەتەوەیەک کە وڵاتەکەی
داگیرکرابێت، نەتەوەیەک کە تیری جەرگ بڕی دوژمنی
وە دڵ کەوتبێت و چاوی دایکانی رۆڵهکوژراوی بە
فرمێسکی خوێنینەوە بێت، هەر بە ڕێز گرتن لە
دەسماڵی دەستی دایکی حوسێن خزری، لانی کەم بۆ
ماوەیەک نابێت دەسماڵی شایی بە دەست بگرێت و هەڵی
سووڕێنێت، جا بە هەر بۆنە یان بەهانەیەک بێت.
بۆ ناردنی کۆمێنت یا روانگه و
بۆچوونی خۆت لهسهر ئهم بابهته، لهم فۆرمه
کهلک وهرگره
|
