|
لەروانینی چاوەکانت
کەژاڵ ابراهیم خدر
kazhal_3@hotmail.com
1
کەسەیری چاوانت دەکەم
وا هەست دەکەم
یاری لەگەڵ کچەکەم دەکەم
ئەو ساتانەی دەڵێ دایە
باتێر سەیری چاوی یەک بکەین
ئاخۆ کاممان پێش ئەوی تر
چاوەکانی دەتروکێنێ
یارییەکە دەدۆڕێنێ
.
2
کەسەیری چاوانت دەکەم
لەدەریایەک رادەمێنم
دەمباتەوە سەردەمی مناڵیمء
لەدوامەوە دایکم هاوارم لێ دەکا
کچێ ،نەڕۆی ئەو دەریایە دەتخنکێنێ
3
لە تێڕوانینی چاوانتا
خەیاڵ دەمباتەوە دنیایەک
دوور لە نیگای چاوەکانت
بەڵام لەوێ
من کوێر دەبم هیچ چاوێکی تر نابینم
4
چاوەکانت مامۆستانء
وانەی عەشق دەڵێنەوە
من خوێندکارێکی تەمبەڵم
لەبەردەمتا وڕوکاسم
نەوەک جارێ
بەسەدان جار بیڵێنەوە
5
لەهەموو ئەندامەکان زیاتر
چاوەکان عاشقن
بەڵام هەمیشە لێوەکان بزە
دەیانگرێء
پەنجەکان سەما دەکەن
6
کەتێر سەیرت دەکەم
لەنێو چاوەکانی تۆدا خۆم وون دەکەم
نازانم تۆ لەچاوەکانی مندا
دەتوێیتەوە
یان من لەچاوانی تۆدا
7
مامانەکە بەمناڵی
هەردوو چاوی بۆ رەش کردی
کەسێ نەیووت … هەڵەی کرد
من نەبێ ،
بەبارانی چاوەکانم بۆم شوشتییەوە
8
باران بەئارەزووی خۆی دەبارێ
بۆیە ناچار بووم، هانام هێنا
بۆ ئاسمانی چاوەکانت
زەوی وشکەوە بووم تێربکات
9
هەرکاتێ بڕیارتدا
بۆ هەمیشە چاوەکانت بخەوێنی
ئەوسا منیش
هەموو خەونەکانم لەدەست دەدەم
.
10
جوانترین پێناسە بۆ خۆشەویستیت
لای من چاوەکانتە
گهر بۆچوونێکت ههیه ئێره کلیک بکه
مافی بڵاوکردنهوهی ئهم
بابهته بۆ ههڵوێست پارێزراوه ، به هێنانی ناوی سهرچاوه
کهڵک وهرگرتن لهم بابهته ئازاده
| 
