ماڵپه‌ڕی دوکتور جه‌عفه‌ری حه‌سه‌نپوور

جه‌فعه‌ر حه‌سه‌نپور jafarhasanpoor@gmail.com

سه‌باره‌ت به‌ به‌رنامه‌ی کۆنگره‌ی نیشتمانی کوردستان

2009.06.04

به‌شی دووه‌م وكۆتایی:

حه‌ولێكی تازه بۆ گه‌یشتن به‌ ستراتیژیای دیموکراتانه‌ی شۆرشی کورد ده‌ستی پێکردووه!

2- کورته و ئاکام

ئه‌لف: ماوه‌ی چه‌ند ساڵه باسی ڕاپرسی گشتی بۆسه‌ربه‌خۆیی وه‌ک به‌شێک له جوڵانه‌وه‌ی نه‌ته‌وه‌یی کوردی لێهاتووه. ئێمه‌ ده‌بێ به‌ڕوونی جیاوازی خۆمان له‌گه‌ڵ هێزه ‌سه‌ربه‌خۆییخوازه‌کانی دیکه که باوه‌ڕیان به‌ ڕاپرسی گشتی نییه ڕوون‌که‌ینه‌وه.

ب: باسێکی دیکه ئه‌وه‌یه که چۆن ئه‌وهێزوتاقه‌که‌سانه‌‌ی که له‌جوڵانه‌وه‌که‌دان له‌باری پڕۆگرام وسیاسه‌ت و له‌کرده‌وه‌دا له‌یه‌کتر نزیکتر ببنه‌وه و ببنه‌‌‌هێزێکی گه‌وره‌تر.

پ: هه‌روه‌ها ده‌بێ سیاسه‌تی ڕێفراندۆمخوازه‌کان سه‌باره‌ت به فیدڕالیزم خوازه‌کان باس بکرێ: پێموایه کاکڵی سیاسه‌ته‌‌‌که ده‌بێ ئه‌وه‌بێ: چۆن ئه‌وهێزانه ده‌کرێ زیاتر کوردستانی بکه‌ین.

1-2- پێشه‌کی

به‌شی یه‌كه‌م له 2009.06.01 دا بڵاوبووه‌ته‌وه.

زنجیره‌که ئه‌مڕۆ ته‌واو ده‌بێ به‌ڵام باسه‌کان له‌وتار وزنجیره‌ی تازه درێژه‌پێده‌ده‌م.

ئه‌م به‌شه پاشکۆیه‌‌کی هه‌یه.

2-3- پێشنیاره‌کانی کاک سیروان کاوسی

کاک سیروان کاوسی، هه‌ڵسوڕاوێکی کۆنگره‌ی نیشتمانی کوردستان، له‌ ڕوانگه‌یه‌کی نه‌ته‌وه‌یی ڕه‌خنه‌ی له بۆچوونی حیزبی دیموکراتی کوردستان گرتووه سه‌باره‌ت به پشتیوانی له‌به‌رنامه‌ی که‌ڕوبی بۆ چاره‌سه‌رکردنی پرسی "قه‌ومه‌کان" و نووسیویه:

"... ئه‌گه‌ر ئێمه‌ی کورد، باوه‌ڕمان به‌وه‌ هه‌یه که ئێمه‌ش نه‌ته‌وه‌ین و، به‌شێک له‌نه‌ته‌وه‌ و نیشتمانه‌که‌مان له‌لایه‌ن رژێمی داگیرکه‌ری ئێرانه‌وه داگیروبه‌شکراوه، سه‌باره‌ت به هه‌ر دیارده‌یه‌ک که پێوه‌ندی به‌چاره‌نووسمانه‌وه هه‌یه، پێویسته له‌ ڕوانگه‌ی ئامانج و به‌رژه‌وه‌ندیی نه‌ته‌وه‌ییه‌وه، شرۆڤه و هه‌ڵوێسته‌یان له‌سه‌ربکه‌ین..."

"... له کۆتاییدا، پێویسته ئه‌م پرسیاره به‌ڕه‌وڕووی خۆمان بکه‌ینه‌وه، چی بکرێت، که هۆشیاری سیاسی و نه‌ته‌وه‌یی گه‌لی کورد بگاته‌ ئاستێک، به‌رژه‌وه‌ندی و ئامانجی نه‌ته‌وه‌یی خۆی بناسێ، چی بکرێت، که گه‌لی کورد بتوانێ باوه‌ڕ به‌خۆی، له‌لا دروست‌ببێ، کوردستان به‌خاک و نیشتمانی خۆی بزانێ و. پشت به‌هێزو توانا و "ڤین" (اراده‌)ی خۆی ببه‌ستێ. خۆی ڕێکبخا و یه‌کیه‌تییه‌کی پته‌و له‌نێوخۆیدا پێکبهێنێ و، دروشمی رفراندم بۆ کوردستان به‌گۆێی رژێمی داگیرکه‌ری ئێران و، دنیای ئازاد بگه‌یێنێت؟!"

"بۆ جێبه‌‌جێکردنی ئه‌م ئه‌رکه گرنگانه، که بێگومان له‌لای هێندێک که‌س و لایه‌نی خۆپه‌رست وده‌سه‌ڵاتخواز، به‌‌خه‌ون و خه‌یاڵ داده‌نرێن، له‌سه‌ره‌تادا پێویسته به‌ره‌یه‌ک، یان یه‌‌کیه‌تییه‌ک پێک‌بهێنرێت له‌نێوان هه‌موو که‌سایه‌تیی نه‌ته‌وه‌یی و ئه‌وحیزب و ڕێکخراوانه‌ی که سترایژ و ئامانجیان، ڕزگاریی نه‌ته‌وه‌ی کورد و، دامه‌زراندنی ده‌وڵه‌تی سه‌ربه‌خۆی کوردستانه و به‌ کرده‌وه خه‌‌‌باتی بۆده‌که‌ن. سه‌رۆکایه‌تییه‌کی هاوبه‌ش بۆجێبه‌جێکردنی ئه‌رک وخه‌باتی هاوبه‌‌‌شیان پێکبهێنن. پلاتفۆرم و پێڕه‌وێک به‌‌ڕه‌چاوکردنی ئامانج و ستراتیژی نه‌ته‌وه‌ییه‌وه ئاماد‌‌ه‌بکرێ و، لایه‌نه‌کانی به‌شدار، به‌پێی به‌نده‌کانی ئه‌و پلاتفۆرمه‌ جۆری خه‌بات و هاوکاریی نێوانیان ڕێکبخه‌ن. به‌شێک له‌کات و به‌رنامه‌ی میدیا و ڕاگه‌یاندنیان ته‌رخان بکه‌ن بۆ کاری په‌روه‌رده‌ و پێگه‌یاندنی ئه‌ندامانی خۆیان و جه‌ماوه‌ری کورد به‌گشتیی، به‌بیروباوه‌ڕی نه‌ته‌وه‌یی و، مێژوویی و فه‌رهه‌نگی و کۆمه‌ڵایه‌تیی. مامۆستایان و، پسپۆڕانی هه‌موو بواره‌زانستییه‌کان بانگێشت‌ بکرێن، بۆگه‌یاندنی زانست و ئه‌زموونی خۆیان به‌جه‌ماوه‌ر. کۆمیته‌یه‌ک له زمانزان و شاره‌زایانی بواری دیپلۆماسی پێکبێت، که له‌ده‌ره‌وه‌ی وڵات، خه‌باتی به‌رده‌وام بکا و، بتوانێت پشتیوانی کۆمه‌ڵی نێو‌نه‌ته‌وه‌یی ڕابکێشێ بۆ چاودێریکردنی رفراندۆمێکی ئازاد له کوردستان."

"ته‌نیا هه‌وڵدان بۆجێبه‌جێکردنی ئه‌م ئه‌رکه‌ مرۆڤی و نه‌ته‌وه‌یی و مێژوویانه‌‌‌یه که ده‌توانێت، نه‌ته‌وه‌ی کورد له‌سه‌رشێواوی وبێچاره‌نووسی ڕزگاربکا و، ڕێگه‌ی ڕاست و ڕۆناکی پێناسێنێ و، بیخاته‌ سه‌رشاڕێی گه‌یشتن به‌ به‌خته‌وه‌ری و ئازادی و سه‌رفرازیی."

2-4- باسێکی کورت له‌سه‌ر پێشنیاره‌کانی کاک سیروان کاوسی

ئه‌لف: منیش وه‌ک کاک سیروان پێموایه که ده‌بێ یه‌کیه‌تییه‌کی زۆرتر هه‌بێ له‌نێوان ڕفراندۆمخوازه‌کان. بۆ ئه‌و نزیک بوونه‌وه‌ش هه‌روه‌ک کاک سیروان نووسیویه، گه‌یشتن به پلاتفۆرمێک پێویسته.

ب: من پێشنیارم ئه‌وه‌یه که هێزوتاقه‌که‌سه‌کان بێین وبه‌راوردی پلاتفۆرمه‌کانی خۆمان بکه‌ین له‌گه‌ڵ یه‌کتر بۆ دۆزینه‌وه‌ی وه‌ک‌یه‌کچوون و جیاوازییه‌کان وساغ‌بوونه‌وه له‌سه‌ر پلاتفۆرمێکی هاوبه‌ش.

2-5- ‌بانگ‌کردن بۆ قسه‌وباس

ئه‌لف: یه‌‌کێک له‌و ده‌ستانه‌ی که لایه‌نگری ڕاپرسی گشتی بۆسه‌ربه‌خۆیین، ده‌سته‌یه‌کن که به‌یانێکیان له‌ژێر سه‌ردێڕی "ڕووناکبیرانی ڕۆژهه‌ڵاتی کوردستان” بڵاوکردووه‌ته‌وه. له‌ژێر به‌یانه‌که ناوی سێ که‌س نووسراوه بۆ پێوه‌ندی گرتن: کاک سه‌لیم بابانزاده،کاک خاته‌م مه‌نبه‌ری و کاک تاهیر خالیدی.

ب: ماڵپه‌ڕی هه‌ڵوێست له به‌ڵگه‌یه‌کدا له‌ژێر سه‌ردێڕی "چوارچێوه‌ی چالاکی و تێکۆشانی هه‌ڵوێست" باسی ئه‌وه‌ی کردووه که باوه‌ڕی به "مافی دیاریی كردنی چاره‌نووس بۆ نه‌ته‌وه‌ی كورد، به‌بێ پێشگر و پاشگر" هه‌یه. داوام له‌وماڵپه‌ڕه‌ ئه‌وه‌یه که له‌ناو ده‌سته‌ی به‌ڕێوه‌به‌ری خۆیدا باسێک وه‌ڕێخا له‌سه‌ر ڕاپرسی گشتی بۆسه‌ربه‌خۆیی و ئه‌وه‌ی که داخودا ئه‌وان ده‌توانن وه‌ک خاڵێکی چوارچێوه‌ی چالاکی و ‌تێکۆشانی خۆیان داینێن.

2-6- سه‌‌رچاوه‌کان

(a) کاوسی، سیروان، گه‌لی کورد له‌نێوان گێژاوی بێچاره‌نووسی و، پرسی 'به‌شداری، یان به‌شدارینه‌کرد' له هه‌ڵبژاردنی سه‌رکۆماریی ئێراندا! (2009-05-29):

http://www.kncscandinavia.com/kurdi/nusrawe/helbjardn_eran.pdf

وتاره‌که‌ی کاک سیروان کاوسی بۆیه‌که‌م جار له ماڵپه‌ڕی کۆنگره‌ی نیشتمانیدا بڵاوکراوه‌ته‌وه به‌ڵام ماڵپه‌ڕی هه‌ڵوێست بۆئه‌‌وه‌ی خوێنه‌ره‌وه‌کانی خۆی له‌‌وتاره‌که‌ی کاک سیروان کاوسی ئاگاداربکاته‌وه، وتاره‌که‌ی جارێکی دیکه بڵاوکردووه‌ته‌وه:

http://www.helwist.com/2009/6/1%20%20helbjardn_%20Sirwan%20k.pdf

(b) ڕووناکبیرانی ڕۆژهه‌لاتی کوردستان! (2009.05.10):

http://www.helwist.com/2%20Geshti/Kesekan/Taher%20Xaldi/12%20%20namey%20gshti.htm

http://www.helwist.com/1%20Taibety/Nasname/Prnsipekan.htm

2-7- پاشکۆ

چوارچێوه‌ی چالاکی و تێکۆشانی هه‌ڵوێست :

1- مافی دیاریی كردنی چاره‌نووس بۆ نه‌ته‌وه‌ی كورد، به‌بێ پێشگر و پاشگر

2- ئازادیی ، دێمۆكراسی ، حورمه‌تی مروڤ وه‌ك تاك و پاراستنی هه‌رێمی كه‌سایه‌تیی ئینسان.

3- دادپه‌روه‌ریی كۆمه‌ڵایه‌تی ، یه‌كسانی و داكۆكی كردن له ماف و خواستی سیاسی، ئابووری و كۆمه‌ڵایه‌تیی كۆمه‌لانی خه‌ڵك

4- سكۆلاریزم ، جیایی هه‌ر چه‌شنه ئیدئۆلۆزیه‌ك ( ئایین ، مه‌زهه‌ب ، ره‌گه‌ز ، مه‌رام)له ده‌سه‌ڵات.

5 - به‌رابه‌ریی ژن و پیاو ، له هه‌موو بواره‌كانی ماف و ژیاندا.

6 - دژایه‌تی وله‌قاودانی خورافه و داب و نه‌ریتی كۆنه‌په‌رستانه

7 - له‌قاودان و ڕیسواكردنی پیلان و سیاسه‌ته‌ شۆڤینیه‌كانی داگیركه‌ران.