دیزاینی پێشوو    نووسه‌ران   ‌  سیاسی     نه‌ته‌وه‌یی     دێموکراسی     ئه‌زمونی‌خه‌بات     هـونــه‌ر     تـه‌نــز     وتووێژ     فارسی     پێوه‌ندی   

 


 

یادداشت  ٦

ئەنوەر سوڵتانی

هەینی، ٣/٣/٢٠١٧

 

بە بیستنی هەواڵی پێکدادانی ڕۆژی ڕابردووی پێشمەرگە و شەڕڤانانی ڕۆژئاوا لە شنگاڵ تاساوم. لە خوو و خەدەی کوێستانیی و ڕوانگەی موتڵەق بینی کورد زۆر نیگەرانم شەڕەکە درێژە پێبدەن، ئەگەریش بیوەستێنن سەرلەنوێ هەڵیگیرسێننەوە، بە تایبەت کە دەستی لاوەکیش لە کاردایە و دنەمان دەدات.

 

ڕاست لەو بارودۆخە ناسکەدا بوو کە لە سەر ماڵپەڕی هەڵوێست چاوم بە وتارێک کەوت لەژێر ئەم سەردێڕەدا: "ئەو پێشمەرگە ژنانەی کە لە ریزەکانی کۆمەڵە لە ساڵەکانی ١٣٥٨ تا ١٣٩٥ گیانیان بەخت کردووە". لەوێدا ناوی ١٣٧ پێشمەرگەی ژن ڕاگەیێنرابوو. ئەو هەواڵە بۆ من جێگەی خەفەتێکی گەورە بوو، بەڵام خەفەتی گەورەتر ئەو ڕاگەیێنراوە بوو کە نزیکەی ١٠ کەس لەو ١٣٧ کەسە لە شەڕی نگریسی ناوخۆیی و پێکدادان لەگەڵ حزبی دیموکراتدا کووژرابوون. ئامارێکی ئەوتۆم لە لایەنەکەی دیکە بەرچاو نەکەوتووە بەڵام دڵنیام حزبی دیموکراتیش ژمارەی گیان بەختکراوانی ژنی لەو شەڕە چەپەڵەدا دەبێ لە دەوروبەری هەر ئەو ژمارەیە بێت، کەمتر یان زیاتر.

 

بە گوێرەی مەنتیقێکی ساکار، ئەگەر ئەوە ئاماری ژنانی کووژراوی هەردوو بەرەی شەڕ! بووبێت، دەبێ ژمارەی کووژراوانی پیاو بە چەند قاتی ئەوان بزانین؛ شەرمەزاری لەوە زیاتریش بۆ 'پێشەنگانی گەل' هەیە؟

 

میللەتی لە گوێی گادا خەوتوو لای وابوو ئەو دەرسە پڕ ئێش وئازارە ببێتە هۆی ئەوەی حزبە چەکدارەکانی کورد هێڵێکی سووریان بۆ شەڕی براکوژی کێشابێت و چیتر تێپەڕی نەکەن. بەڵام ئەوان عومرێک شەڕی یەکتریان کردووە و پێی ڕاهاتوون، تەرکی عادەتیش نەخۆشی دێنێت، جا مانگی ڕابردوو پێکدادانێک لە نێوان هێزی چەکداری پ ک ک و پارتی دیموکراتی کوردستاندا ڕوویدا و ١٣ کەس لە هەردوولا کووژران، گەرچی هەردوولایان لە ترسی تووڕەیی خەڵک سەرپۆشیان نایە سەر و ڕاستییەکەیان لە خەڵک شاردەوە- کارێکی بێ سوود لەبەر ئەوەی هەرئێستا بڵێسەی ئاگر لە شنگاڵەوە سەری هەڵداوە و پاڵەوان پەممۆکان ڕووبەڕووی یەک وەستاونەتەوە. ئافەرەم بۆ وەفای هەردوولا بە خەڵک و نیشتمان!

بە داخەوە، ئەگەر چاوەڕێ بین ئەو باخە دۆزەخییە گوڵی سووری زیاتریش لە خوێنی لاوانی کورد بەرهەم بێنێت، کارێکی ناماقووڵمان نەکردووە.

 

سێ شەممە،٧/٣/٢٠١٧

هەواڵێکم خوێندەوە سەبارەت بە کوردانی دانیشتووی سوودان. بەو چەشنەی لە هەواڵەکەدا باس کرابوو، دەبێ ٨٠ تا ١٠٠ هەزار کەس لە سوودان هەبن کە بە ڕەچەڵەک کوردن! ئێستا دوای لوبنان و ئیسرائیل و قازاخستان و ئازەربایجانی باکووری، دەبێ سوودانیش لە لیستەی وڵاتانی "کورد تێدا فەوتاو" یان "تیانەی توانەوەی کورد" زیاد بکەین. سەری پەتەکە بگرە و بچۆ بۆمیسر و پاکستان و ئەفغانستان و تەنانەت بۆ ئاڵبانیا و هۆنگاریاش!

-        ئەو تووی هەرێزە بە کێ کۆدەبێتەوە؟

-        بە کەیانێکی نەتەوەیی! جوولەکە لە ئێمە پەرش و بڵاوتر بوون و توانییان کۆی بکەنەوە.

-        ئەو کەیانە چۆن دادەمەزرێت؟

-        بە دڵنیایی شەڕی شنگال وەدیهێنەری نابێت!

چوار شەممە، ٨/٣/٢٠١٧ 

ئەمڕۆ ڕۆژی جیهانی ژن بوو. لە وڵاتانی ڕۆژئاوادا، سەرچاوە فەرمی و دەوڵەتییەکان بە نیونیگایەک بە سەر هەواڵی ڕووداوەکانی ئەو ڕۆژەدا تێدەپەڕن و دەڕۆن. هۆکاری سەرەکی مەسەلەکە سیاسی بوونیەتی و گرنگی پێدانی لە لایەن ڕێکخراوە چەپ و فێمینیستییەکانەوە، کە هیچ حکوومەتێکی ڕۆژئاوا خۆشی لە چارەیان نایەت. 

بەڵام هۆکارێکی دیکەش هەیە و نابێ سەرنجی نەدرێتێ. ئەویش ئەوەیە ڕۆژی ژن هێشتا نەبۆتە 'مارکێت' و بازاڕی کڕین و فرۆشتنی دیاری و پێشکەشی! سەیرێکی ڕۆژی ڤالنتاین و ڕۆژی دایک و ڕۆژی باوک بکەن، بزانن لە ماوەی ئەو ڕۆژانەدا چەندەها ملیار گوڵ و چۆکلێت و شتومەکی پەیوەندیدار و بێ پەیوەندیی ئەو ڕووداوە مێژووییە بە خەڵک دەفرۆشرێت، ئیتر باسی کریسمەس و ئیستر (پاک) هەر مەکەن کە تێیاندا عیسای هەژار ناوی لە کوولەکەی تەڕیشدا نابرێت و بایەخی ئەو هێلکە چۆکلێتییەی پێ نادرێت کە بۆ منداڵانی دەکڕن، بەڵام بەحری دیاری کڕین لە هەموو دووکان و شەقامێکدا مڵق ئەدات! لە ڕۆژئاوا هەموو شتێک کالایە و نرخەکەی لە بازاڕدا دیاری دەکرێت.

دەبێ گەلێک خۆشحاڵ بین کە ڕۆژی ٨ ی مارس بایەخە شۆڕشگێڕانە و سیاسی-کۆمەڵایەتییەکەی پارێزراوە و هێشتا نەبۆتە کالا!

پێنج شەممە، ٩/٣/٢٠١٧

'عەبدولکەریم سروش' زانای ئایینیی ئێران، کە ئێستا لە دەرەوەی وڵات دەژی، ماوەیەکە لە ئیسلام ڕاساوەتە سەر پێ و گوایە دەڵێ مەولانای ڕۆمی (سەدەی شەشەمی زایێنی) ئایینێکی جیاواز لە ئیسلامی هێناوەتە گۆڕێ، بەڵام خەڵک لێی تێنەگەیشتوون و ئەویش لە ترسان نەیوێرا ئاشکرای بکات.  ئەوەی خوارەوە یەک لە بۆچوونەکانی دیکەیەتی:

"وەحی ئەنبیا خەونن و دەبێ تەفسیر (خوابگوزاری) بکرێن... قورئان حاسڵی ئەو خەونانەیە وا پێغەمبەری ئیسلام بینیویەتی؛ زمانی قورئان و زمانی وەحی زمانی خەونن، زمانی بێداری نین؛ ئەو وێنەیەش کە پێغەمبەر لە بەهەشت و جەهەننەمی دەکێشێتەوە، لە خەونیدا بینیویەتی".

ئافەریم مەلا کەریم! ماوەی ٤٠ ساڵ زوڕنات بۆ مامۆستاکانی قوم و مەشهەد لێدا، بەڵام بیلامانێ هینیان بە کڵاوت نەپێوا، ئێستاش بەڵکوو ئایینێکی نوێ بهێنی و خەڵکانی وەک خۆت بە دەورتەوە کۆبکەیەوە، خۆ ئەگەر مۆجزەیەکی وەک شق القمریشت پیشانی خەڵک بدایە، ئیتر بە شەوێک ژمارەی 'ئۆممەتی سرووشی' لە سەرجەم جەماعەتی ئوپۆزیسیۆنی ئێرانیی دانیشتووی دەرەوەی وڵات زیاتر دەبوو!

 

پێوەندیی:     helwist@gmail.com

 

 

 

 

 

 

 

 

لاپه‌ڕەی تایبەت

 

بەشەکانی دیکە

بەشی ١

بەشی ٢

بەشی ٣

 بەشی ٤

 بەشی  ٥