موفتیزم و سەرهەڵدانەوەی دووبارەی لە کوردستان

هەڵۆ- سەقز

شۆڕشی گەلانی ئێران دژی رژیمی پەهلەوی و روخانی حکومەتی پاشایەتی لە رێبەندانی 1357بە دستی خەڵک، هەرچەند یەکگرتوویی و هاوپشتی گشتی کۆمەڵگای لە پرۆسە و پێکهاتنی سەرکەوتنی شۆڕش لە گۆڕەپانی کۆمەڵگادا بۆ داخوازیی ماف و داخوازییە دیموکراتیکی و مرۆییەکانی کۆمەڵگای ئێرانی بەنمایش دەرهاورد، بەڵام رووداوو پێشهاتەکانی پاش شۆڕش و بەدەسەڵات گەیشتنی ئیسلامگەرا توندڕەوەکان و باندی رۆحانیەتی شیعەی ئێرانی، شکستی دیموکراسی و ئازادیخوازی بەدواوەبوو. هەرچەند خواستە دیموکراتیک و مرۆییەکانی ژنان و پیاوانی کۆمەڵگای ئێران زۆر لە گەڵ هەڵومەرجی ئەمڕۆدا و جۆری داخوازییە دیموکراتیکییەکانی ئەمڕِۆدا جیاوازی هەیە، بەڵام پێویستی گۆڕان لەموناسەباتی کۆمەڵایەتی ئێران لەبواری  سیاسی، ئابوریی و فەرهەنگیدا بابەتێکی حاشاهەڵنەگرە. لە رۆشنایی هەرئەم شۆڕشە خەڵکییەدا کە کۆمەڵگای ئێرانی سەدان ساڵ لە دیموکراسی و هەرچەشنە ئازادییەکی بیروڕا و ئەندێشە دوورخستەوە، بەڵام لە قۆناغێکی کورتدا دەستکەوتگەلێکی بۆ خەڵک بە دیار هێناو دەرکی خواستەکان و هەڵبژاردنی حیزبەکانی بۆگەیشتن بە بارودۆخێکی ئازاد و دیموکراتیک لە بەردەم خەڵکی ئێراندا دانا. فەزای کراوەی سیاسی و دیالۆگی ئەندێشەکان لە کۆمەڵگای مرۆییدا پێویستی بە دۆخێکی هێمنە بۆ گەیشتن بە دیموکراسی و ئامانجگەلی دیموکراتیک و عەداڵەتخوازانە.

رەنگە ساڵەکانی 57 تا 60، ئەم سێ ساڵە، بە تاڵترین و شیرینترین رۆژەکانی ئازادی و دیموکراسی لە ئێران بێتەئەژمار. بەتایبەتی ناوچەکوردنشینەکان و کوردستانی ئێران ئەویش بەبەرەکەتی حیزبە ئازادیخواز و دیموکرات و رادیکاڵەکانەوە کە بە ئیمان بە ئازادی و سێکۆلاریزم و کۆمەڵگای مەدەنی و خەڵکسالار بە دوای مافە زەوتکراوەکانی نەتەوەی کوردەوە بوون کە ساڵانێکی دوورو درێژ لەلایەن رژیمی پاشایەتی و زوڵمی بەرپرسانی دەوڵەتانی پێشووی تارانەوە پێشێلکرابوو. لەم نێوەندەدا کەسانی شەرافەتمەند، عەداڵەتخواز و ئازادیخواز چ بە شێوەی تاک لە بە هۆی نفوزی کەسایەتی خۆیانەوە و چ بەشێوەی چەقبەستوو  و حیزبی، هەوڵیان دەدا کە لە دەرەنجامی شۆڕش و گۆڕانی بارودۆخی حاکمییەت خواستە نەتەوەیی و دیموکراتیکییەکانی نەتەوەی کورد جێگیربکەن و مافە زەوتکراوەکانی خەڵکی کوردیان بە شێوەی رەواو قانونمەند لە دەوڵەتی ناوەندی تاران داوا دەکرد.

هەرلەم بارودۆخە رێژەییەی دیموکراسی لەکوردستان و دەورونەقشی حیزبە رادیکاڵەکان و جەرەیانە چەپ و ئازادیخواز و سێکۆلارەکانی کۆمەڵگای کورد، جەرەیاناتێکی تر بوون کە نەتەنیا باوەڕیان بە داکۆکیکردن لە مافەڕەواکانی نەتەوەی کورد نەبوو، بەڵکو هەڵگری فەزای دیموکراسی و سێکۆلاری کۆمەڵگای کورد نەبوون. بەشداری ژنان و پیاوان بە شەوق و شعوری سیاسی سەرەوە کە توانای هەر چەشنە بزوتنەوەیەکیان بە ئیرادەی پۆڵایین بە داهاتوویەکی باشتر و ئینسانی تربۆ خۆیان و کۆمەڵگا خوازیار بوون، گۆڕەپانی سیاسی، فەرهەنگی کوردیان پاش ساڵانێکی دوورو درێژ کە تێکەڵ بە ناسیۆنالیزم بوو، ئاڵوگۆڕیان بەسەردا هێنا، بەڵام رەوتی رووداو و پێشهاتەکانی کوردستان و خواستەکانی وەفدی نیەتی پاکی کورد (هیئت حسن نیت) و وتووێژەکانی ئەم وەفدە لەگەڵ دەوڵەتی کاتیی بازرگان دەرەنجامێکی نەبوو، بەرەکانی دەسەڵاتخوازی رۆحانییەتی مەزهەبی لە تاران هیچ نییەت پاکییەکیان سەبارەت بە داخوازییەکانی نەتەوەی کورد و دیالۆگی سیاسی نەبوو. ئەوان بە دەرگیرکردنی نەخوازراوی خەڵکی کوردو جەرەیانە سیاسییەکان و حیزبە نەتەوەیی و چەپەگەراکان، ئاراستەی رەوتی ئەم دیالۆگەیان بۆ شەڕێکی ناوخۆیی هاوڕێ لەگەڵ سەرکوت و کوشتاری خەڵک و، قەتلوعامی هێزە ئازادیخواز و رادیکاڵەکانی کۆمەڵگا گۆڕی کە تا ئێستاش بەردەوامە. بەڵام یەکگرتویی و هاوپشتی کورد لەو قۆناغەدا لە جوغرافیای سیاسی و مێژووی خەباتی گەلی کورد لەئێران زۆر شایانی رێزە، بەهەرحاڵ نەتەوەی کورد لە قۆناغێکدا بە ئیئتیلافێکی سیاسی حیزبەکان و کەسایەتییە سیاسی و مەزهەبییەکان هاتنە ناو مەیدانی وتووێژ لەگەڵ دەوڵەتی مەرکەزیی. ئەڵبەت من ئەمە بە پێی کات و شوێن راڤە دەکەم کە پێموایە دەبێت بۆ هەڵسەنگاندنی ئەم بابەتە دەبێت بارودۆخ و موناسەباتی سیاسی ئەو سەردەمە لەبەرچاو بگیرێت.

دیموکراسی خوازی و سێکۆلاریزمی کۆمەڵگای کوردستان هاوڕێ لە گەڵ عەداڵەتخوازی و ئامانجە مەزنەکان و خەونی ناوچەیەکی خودموختار لەو سەردەمەدا و بەئێستاشەوە خواستی گەلی کورد بوون، کە لەو ناوچەیەدا مرۆڤەکان بە هەر مەرام و عەقیدەیەکی سیاسییەوە تێیدا خاوەنی حورمەت و کەرامەت بن و بەشداری لە چالاکییە فیکری و فیزیکییەکانی کۆمەڵگادا بکەن. بەرگری لەمافی زەحمەتکێشان و کرێکاران، بێکاران و سەدان خواستی دیموکراتیک و مرۆڤانە و دیالۆگ لە کۆمەڵگا و پێویستیی خەبات بۆ دەستبەرکردنی ئەم خواستانە، نەک تەنیا بەدڵی بەرەکانی پاوانخواز و مەزهەبی تاران نەبوو، بەڵکو بە نانەوەی ئاژاوە و دنەدانی لایەنگەلێک لە ناوخۆی کوردستان بەمەبەستی لاواز نیشاندانی دیموکراسیخوازیی و ئازادیخوازیی نەتەوەی کورد، بەدروستکردنی ئاژاوە و دووبەرەکایەتی و پێکهێنانی ستونی پێنجەم لە کوردستان و بەتایبەتی شاری سنە، کە یەکێک لە ناوندە سیاسییەکان و جەمسەرێکی سەرەکی جەرەیانانی چەپ و نەتەویی بوو، ویستی ئەم هەوڵەی نەتەوەی کورد لەبار ببات.

فیرقەی موفتی زادە یەکێک لەو لایەنانەی رەوتی نەیاری ئازادی و سێکۆلاریزم لەکۆمەڵگای کوردستانی ئێران بوون. هاوکاریی و بەرگری لە دروشم و خواستەکانی دەوڵەتی ناوەندیی بەتایبەتی شەخسی خومەینی و هاندانی هەستی مەزهەبی خەڵک لەبەرابەر سێکۆلاریزم و جیایی دین لە دەوڵەت و سیاسەت و، دژایەتی لەگەڵ بەشداری ژنان لە کاروبارە سیاسی و کۆمەڵایەتییەکان، هەوڵدان بۆ بەرقەرارکردنی دەسەڵاتی ناوەندیی و، بەگشتی لەو بارودۆخە دیموکراتیکییەی کوردستان فیرقەی موفتی زادە ببوونە گۆچانی دەستی خومەینی و بەڕٍێوەبەری سیاسەتەکانی رژیم لەکوردستان. ئیئتیلافی دەوڵەتی بازرگان و جەرەیانە پاوانخوازەکانی تاران لەگەڵ ئەحمەدی موفتی زادە و مەکتەبی قورعان، وەک جەرەیانێکی دەمارگرژی سوننی و پەرەپێدەری وەهابییەت، هەرچەند لە روانگەی سیاسی و مەزهەبی زۆر کۆک نەبوون و پێکەوە نەدەکوڵان، بەڵام هەڵویستەکانی موفتی زادە لە روانگەی سیاسی و مەزهەبی لە داکۆکیکردن لە رابەرایەتی مەزهەبیی خومەینی و بڕوابوون بە دەسەڵاتی مەزهەبی لە ئێران و دژایەتی ئەم رەوتە لەگەڵ خواستە دیموکراتیکییەکانی بزوتنەوەی نەتەوەیی گەلی کورد و سەدان هۆکاری دیکە، ئاکامی ئەم ئیئتیلافی شوومە دژ بەگەلی کورد بوو. خەیانەتکردن لە بزوتنەوەی دیموکراتیک و رادیکاڵی گەلی کورد و هەوڵەکانی دواتری موفتی زادە و هاوکاریی کردن بۆ داگیرکردنی شارەکانی کوردستان بە دەستی هێزەکانی ئەرتەش و سپای پاسداران و ناساندن و بەدەستەوەدان و دەستگیرکردنی هەڵسوڕاوانی چەپ و ئازادیخواز بەتایبەتی لە شارەکانی سنە و سەقز و مەریوان و.. لەسێدارەدان و قەتڵوعامی زۆربەی ئەم کەسانە لەلایەن رژیمی ئیسلامی و دادسەراکانی ئینقلاب، کارنامەی یەک دەورە لە هەڵسوڕانی سیاسی و خەباتی کاک ئەحمەدی موفتی زادە لەکوردستانە. بەدڵنیاییەوە لەبیرەوەری سیاسی خەڵکی کورددا هاوکاری و هاودەستی رەوتی سەفدەری لە پادگانی شاری سنە و ئەحمەدی موفتی زادە لەشاری سنە، وەک دوو کاراکتەری نەگەتیڤ لەبەرابەر بزوتنەوەی دیموکراتیکی گەلی کورد هیچکاتێک فەرامۆش نابێت.

مەکتەبی قورعان و کاک ئەحمەد لەسەر ئەو باوڕ و خۆش خەیاڵییە بوو کە ئینقلابی ئیسلامی هێشتا دانەمەزراوە و نابێت دژایەتی بکرێت، چونکە بەبڕوای ئەوان ئیسلام و ئینقلابی ئیسلامی توانا و زەرفەیەتی ئەوەیە هەیە کە داخوازییە نەتەوەییەکانی گەلی کورد دەستەبەر بکات. هەر بۆیە نەیدەویست جۆرێک کاربکات تا لە ئینقلاب و کەرامتی ئینقلابی ئیسلامی کەمترین زەرەرو زیانێک بکەوێت.

هەرچەند رژیمی ئیسلامی لە هەوڵەکانی دواتریدا ریگەی نەدا خودی موفتی زادە لە دەسەڵاتی سیاسی و گەمەی دەسەڵات لە کوردستان و ئێران بەشداری بەکات و دواتر و پاش ماوەیەکی کورت موفتی زادە و ژمارەیەک لەهاوبیرانی لە خەزەڵوەری ساڵی 1358 لەسنەوە بۆ شاری کرماشان گواستوە و پاشانیش بۆ تاران و لەوێش دەستگیرکران.

رەوتی ئیسلامی موفتی زادە و باقی حیزبە سیاسییە ئێرانییەکان کە پاش شۆڕشی 57 بەرگرییان لێدەکرد و لەریزی نوێژی هەینەییەکان لە پشت سەری رابەرانی مەزهەبی تاران نوێژی جەماعەتیان دەکرد، دواتر پاش ئەوەی داواکارییەکانی خۆیان بۆ رژیم خستەڕوو و پاش ئەوش کە هیچ دەورو نەقشێکیان نەما و بێ خاسیەت بوون، یەک لە دوای یەک توشی غەزەب و توڕەیی رژیمی مەزهەبی شیعەبوونەوە و بەدوای یەکدا سڕانەوە. رژیمی ئیسلامی پاش دەستگیرکردنی رابەران و تێکشکاندنی رێکخراوە سیاسییەکانیان، لەبەردەم چالاکی سیاسی لە زۆرێک لەوان چ لە بەرەی چەپ و چ لە بەرەی راستی نەتەوەخواز رێگری کرد و لەماوەی ئەم سی ساڵەدا زۆرێک لەم حیزب و رەوتانە بە تەواوی لەگۆڕەپانی سیاسی ئێران سڕییەوە، یان ئەو رەوتانە بە بێدەنگبوون و تەسلیم بوونیان، مۆری تەییدیان لەسەر کردەوەکانی رژیمی کۆماری ئیسلامییان دانا.

بەڵام بەسەرنجدان بە بارودۆخی ئابوریی، سیاسی، فەرهەنگی و کۆمەڵایەتی ئەمڕۆی کوردستان بەبەراورد بە سێ ساڵی رابردوو، بەسەرجەم هەستان و کەوتنەکانی بزوتنەوەی نەتەویی دیموکراتیک و سێکۆلاری خەڵکی کوردستان و گەشەی رۆژ لەدوای رۆژی ئاگاهی سیاسی و پوتانسیەلی رادیکالیزم لەم خەباتەدا کە هیچ رەهەندێکی مەزهەبی نییە، ئەم پرسیارە دێتە ئاراوە کە بۆچی رەوتی "موفتیئیزم" دووبارە لە کوردستان سەری هەڵداوەتەوە و سەرچاوەی تاکتیکی و بەرژەوندی کۆماری ئیسلامی لەکوێدایە کە بە ئاشکرا لە بەرامبەر چالاکی و جموجۆڵی ئەم رەوتە لەکوردستاندا بێدەنگی هەڵبژاردوە و تەنانەت لەپشتی پەردەشدا پشتگیری سیاسی و ماڵییان دەکات.

حزوری ئەمریکا لە ناوچەکە و روخانی رژیمی سەدام حسەین بە دەستی هێزەکانی ئەمریکا و هاوپەیمانانی، هەرچەند بۆ خەڵکی ئێران رووداوگەلێکی تاڵ و شیرین بوون، بەڵام وانەیەکی گەورە بوو بۆ دیکتاتۆریەتی مەزهەبی لە ئێران و لەوە ئاگاداری کردنەوە کە خەڵکی ناوچەکە خوازیاری گۆڕانی سیستمی ملهوڕ و دیکتاتۆری دەسەڵاتدارانی ئێستای خۆیانن و بە پشتیوانی هێزی دەرەکی ئامادەن تا بارودۆخی ئێستایان بگۆڕن و سەردەمێکی دەسەڵاتی دیموکراسی خوازی و خەڵکسالاری ئەزمون بکەن. رژیم بە باشی ئەوەی دەرک پێکردبوو کە رژیمی پێشووی بەغدا نەیتوانی بە دنەدانی هەستی نەتەوایەتی، خەڵکی عەرەب و عێراق مەجبوربکات تا لەبەرامبەری ئەمریکادا بوەستن، بەڵکو رژیمی بەغدا لە دوایین ساتەکانی لەسەرکارمانی خۆیشیدا کەوتە هاندانی هەستە مەزهەبییەکانی خەڵک تا بەم شێوەیە ئەوان بەدوای سیاسەتە کۆنەپەرستانە و دژە دیموکراتیکییەکانی خۆیدا رابکێشتێت، بەڵام ئەمە رووینەداو نە دنەدانی هەستە نەتەوایەتییەکانی عەرەب وەڵامدەربوو نەک هاندانی مەزهەبی...

ئەگەرچی بارودۆخی ئێستای وڵاتی عێراق لێوانلێوە لەنائارامی و تەوژمی تیرۆریزمی ئیسلامی و، سەرهەڵدانی گروپە توندڕەوە ئیسلامییەکانی شیعەو سوننی کە لە لایەن وڵاتانێک وەک ئێران و سوریا داڵدەدراون و یارمەتی مادی و مەعنەوەی دەکرێن و نانەوەی ئاژاوە و نائارامی لەلایەن ئەم لایەنانەوە، بەڵام چاوەڕوان دەکرێت ئەمەش لە پاش ئارامبوونەی  رێژەیی شار و ناوچەکانی عێراق بەرەبەرە لەم وڵاتەدا سەردەمی دیالۆگی سیاسی لە نێوان حیزبەکانی شیعە و سوننی و نەتەوەگەراکاندا بەرقەرار بێت و بارودۆخی کۆمەڵایەتی عێراق بە پشتیوانی ئەوروپا و ئەمریکا روولەئاسایش و ئاوەدانکردنەوە بکات. هەرلەم وڵاتی شەڕو ئاژاوەدا بارودۆخی باکوری ئەم وڵاتە بە بەرەکەتی حیزبە رادیکاڵ و دیموکراتییەکانی کورد لە کەشێکی ئارام و جیاوازلە ناوچەکانی تری عێراقەیە. بوونی حیزبی سیاسی نەتەوەیی و رادیکاڵ لەبزوتنەوە دیموکراتیکییەکانی خەڵکی کورد لە وڵاتانی داگیرکەری کوردستان (تورکیا، ئێران، عێراق، سوریا) توانای سیاسی و ئازادیخوازی گەلی کوردیان دوو ئەوەندە کردوەو، ئەمەش نەک تەنیا لە عێراقدا وەک هێزێک بۆ هاوسەنگی هێزە عێراقییەکان ئامادیە، بەڵکو راشکاوانە دەکرێت بڵێین کە ئەم هێز و زەرفیەتە لە بزوتنەوە ناسیۆنالیستییەکانی کورد بەهۆی بوونی حیزبە رادیکاڵ و پێشکەوتنخوازەکان و، خواستە مرۆییەکانی ئەم حیزبانە هەمیشە پایەگایەک بوون بۆ ئازادیخوازی و دیموکراسیخوازی باقی نەتەوەکانی تری ئەو وڵاتانەی کوردی لێیە. هەر ئەم خاڵە بەهێزەی بزوتنەوەی ناسیۆنالیزم لە ناوچەی رۆژهەڵاتی ناوەڕاستە کە لە هاوکێشە نێودەوڵەتییەکاندا حسابی لەسەر دەکرێت. لەسەرەوەبوونی شعوری سیاسی و نەبوونی میکانیزمی دەمارگرژی و توندڕەوی ئیسلامی لە نێو نەتەوەی کورد چ لە عێراق و چ لە پارچەکانی دیکەی کوردستان، بە هۆی بوون و حوزوری مەعنەوی و فیزیکی حیزبە ئازادیخوازەکانی کوردەوە بووە و ئەمەش راستییەکی حاشاهەڵنەگرە.

هەر ئەم خاڵەش هۆکارێکە بۆ وەسوەسە بوون و هاندانی کۆماری ئیسلامی بۆئەوەی گەڵ رادیکاڵیزمی سیاسی ئەم بزوتنەوانە بەرەوڕوو بێتەوە و یان لەباریان بەرێت یاکو ئاڵوگۆڕیان تێدا دروست بکات. گەمەی سیاسی و نانەوەی دووبەرەکی و ئاژاوە لەنێوان ئامانجە سیاسی و کۆمەڵایەتییەکانی ئەم بزوتنەوانە پرۆسەی کۆماری ئیسلامییە کە ئەمەی لە کوردستانی عێراقدا ئەزمون کردوەو توانیویەتی بە پشتیوانی ماڵی و سیاسی لە رەوتە مەزهەبییەکان بە ئاراستەی سیاسەتەکانی خۆی بەکاریان بێنێـت.

ئەمڕۆش هەر ئەم ئەزموونە لە کوردستانی ئێران لە لایەن کۆماری ئیسلامییەوە لەسەر بزوتنەوەی نەتەوەیی دیموکراتیکی کوردستانی ئێران و لە بارودۆخێکی نوێدا تاقیدەکرێتەوە. ئەمەش لە حاڵێکدایە کە شەپۆلی ناڕەزایی گشتی و بزاڤەکرێکاری و پیشەییەکان، ناڕەزایی کۆمەڵگای زانکۆیی  بە سیاسەتە ئابوریی و فەرهەنگییەکان و داخوازیی بۆ پێکهێنانی ئاڵوگۆڕ و فەزایەکی کراوەی سیاسی بۆ بەیانی ئەندێشە و ئازادی، بەشداری ژنان لە خەبات بۆ نەهێشتنی هەڵاواردن و بەرابەری  مافە سیاسی و کۆمەڵایەتی و ئابورییەکانی خۆیان لە بەرامبەر دژە ژنبوونی یاسا ئیسلامییەکان، گوشار و ناڕەزایی رای گشتی لە کۆمەڵگای کوردستان بۆ نەهێشتنی ستەمی نەتەوایەتی و پێکهێنانی بەرابەری و دەستەبەرکردنی مافی شارۆمەندی و... رۆژبەرۆژ لە حاڵی پەرەسەندندایە. رژیمی ئیسلامی بە پشتگیری کردن لە ناوندە مەزهەبییەکان و هەڵخراندنی هەستی گشتی کۆمەڵگا و رەواجی خورافەپەرستی و رێگەدان بە چالاکی مەزهەبی شێخەکانی ناوچەکە و بەخشینی کەسایەتی بەوان، هەروەها پێکهێنان و پەرەدان بە مزگەوت و تکیە و خانەقاکان لە شارەکانی کوردستان لەم چەند ساڵەی دواییدا و ژیانەوەی دووبارەی فیرقە مەزهەبییەکان وەک وەهابییەکانی موفتی زادە، تەواوی هەوڵەکانی خۆی بۆ بەلاڕێدا بردنی رادیکالیزمی بزوتنەوەی کورد خستۆتەگەڕ. لەم پێناوەشدا و بۆ زیاتر گەشەکردنی رەوتی مەزهەبی موفتی زادە چەندین پوئەن و ئیمتیازی بۆ لەبەرچاو گرتوون، لەوانە پێکهێنانی تەعاونی خەدەماتی و بەرهەمهێنان و بیناسازی بۆ چالاکییە ئابوریی و داراییەکانیان، پێکهێنانی ناوەندەکانی چاپ و بڵاوکردنەوە بۆ نامیلکە و نوسراوە ناوخۆییەکانیان، رێگائاواڵاکردن بۆ هەرچەشنە کۆبوونەوە و بەدەوریەک کۆبوونەوە لە ماڵی ئەم کەسانە، بەردەوامبوونی جەماعەتی نوێژی هەینی تایبەت بەم رەوتە لە شوێنە تایبەتەکان، کردنەوەی کلاس و وانەکانی قورعان بۆ ژنان و منداڵانی ئەندامانی ئەم رەوتە و حیجابی زۆرە ملی و یەکدەست لە ناو بنەماڵەکانیان (کە لەم نێوەندەدا زۆرێک لە منداڵان و ژنانی ئەندامانی ئەم رەوتە  کۆنزەفاتیڤە دەبنە قوربانی مەرامی پیاوەکانیان)، دانی وام  بۆ دروستکردنی ماڵ و بیناکانیان، سازدانی کۆنفرانس لەشارە جیاجیاکانی کوردستان، رێگەدان بەهاتوچۆی ئەندامانی رەوتی موفتی زادە بۆ خوێندنی وانە ئیسلامییەکان لە سیستان و بەلوچستان و دروستکردنی پێوەندی لەگەڵ توندڕەوە ئیسلامییەکان لەو ناوچانە و... چەندین هاریکاری تر. ئەمەش لە پێناو ئەو سیاسەتەی رژیمە کە دەیەوێت هاوسەنگی سیاسی و رادیکالیزمی بزوتنەوەی کورد تێکبدات و لە داهاتوودا لە ئەگەری هەر چەشنە ئاڵوگۆڕێک بتوانێت کەڵکیان لێ وەرگرێت و ئەو رەوتە وەک حیزبوڵای لوبنان و حەماسی فەلەستین و ئەنسارئیسلامی عێراق بە ئاراستەی سیاسەتەکانی خۆی بەکار بێنێت.

بەڵام راستییەک کە هەیە و دەبێـت کۆماری ئیسلامی بیزانێت ئەوەیە کە ژێرخانی فیکری و شعوری سیاسی کۆمەڵگای سیاسی نەتەوەی کورد بۆ دواوە ناگەڕێتەوە و بەشداری چالاکانەی پیاوان و ژنانی ئازادیخوازی کورد لەبزوتنەوەی دیموکراتیک و سێکۆلاری دواڕۆژی کۆمەڵگای ئێراندا، پیلانەکانی کۆماری ئیسلامی لە بەهاری سبەی رۆژی  ئازادی ئەم وڵاتە، وەک بەفری زستان دەکاتە ئاو.

 گه‌ر بۆچوونێکت هه‌یه‌ ئێره‌ کلیک بکه

تکایه‌ ئیشاره‌ بکه‌ن که‌ په‌یامه‌که‌تان له‌سه‌ر کام بابه‌ته‌

مافی بڵاوکردنه‌وه‌ی ئه‌م بابه‌ته‌ بۆ هه‌ڵوێست پارێزراوه‌ ، به‌‌ هێنانی ناوی سه‌رچاوه‌ که‌ڵک وه‌رگرتن له‌م بابه‌ته‌ ئازاده‌