ئه‌و درۆ زلانه‌ی حکوومه‌تی تورکییه‌ ، ساڵانی زووی وه‌بیر هینامه‌وه‌. ئه‌وکاته‌ی که‌ هێزه‌کانی رۆژهه‌ڵات هیشتا بنکه‌ و مه‌قه‌ڕیان له‌ شاخه‌کان بوو و تووشی ئوردووگا نشینی نه‌بووبوون. له‌و کاتانه‌دا شه‌ڕ له‌هه‌موو شێوازه‌کانی دژی له‌شکری داگیرکه‌ر له‌ ئارادا بوو و حکوومه‌ت به‌ته‌واوی عاسێ ببوو. بۆیه‌ به‌رده‌وام له‌ ڕاگه‌یه‌نه‌ره‌کانیه‌وه‌ درۆی (وه‌ک ئه‌وه‌ی ده‌وڵه‌تی تورک) ی بڵاو ده‌کرده‌وه‌.

بۆ نموونه‌ جاده‌ی نێوان بانه‌ سه‌رده‌شت که‌ هه‌مووی ناکاته‌ 60- 70 کیلومێتر، هه‌موو رۆژێک ڕایده‌گه‌یاند 15- 20 کیلوومێتری گرتووه‌ته‌وه‌. شه‌ر له‌ نێوان ئه‌و جاده‌دا ‌ماوه‌ی نزیک مانگ و نیوێکی خایاند و حیسابمان کرد به‌ پێی ئیدیعاکانی حکوومه‌تی ئێران نزیک 600 کیلوومێتری گرتبووه‌وه‌، واتا چتێکی وای نه‌مابوو له‌ رێگه‌ی بانه‌وه‌ بگات به‌ ئورشه‌لیم!!  ئیتر چه‌نده‌ پێشمه‌رگه‌ی کوشتبوو، ژماری له‌ هه‌موو پێشمه‌رگه‌کانی کۆمه‌ڵه‌ و دێموکرات و خه‌بات(له‌م به‌ره‌دا خه‌باتیش له‌ شه‌ردا بوو) زۆر زۆرتر بوو.

له‌وه‌ش سه‌یر تر ئه‌وه‌ بوو که‌ ئه‌و سه‌رده‌مه‌ هه‌م خه‌ڵک و هه‌م پێشمه‌رگه‌ بۆ په‌ڕینه‌وه‌ له‌ چۆمه‌کان به‌ هۆی نه‌بوونی پرد، شێوه‌ به‌له‌مێکی ده‌سکرد به‌ناوی "که‌ڵه‌ک" یان به‌کار دێنا که‌چوار لاستیکی ئوتوموبیل یا تراکتۆریان لێک ده‌به‌ست و دار و ته‌خته‌یان له‌سه‌ری ڕاده‌خست و قایمیان ده‌کرد و پێی ده‌په‌رینه‌وه‌. باش له‌بیرمه‌  له‌ ناوچه‌کانی چۆمی مه‌جیدخانی سه‌ربه‌ مه‌هاباد، چۆمی که‌ڵوێ(ناوچه‌ی سه‌رده‌شت) و ناوچه‌ی مه‌ریوان ، رادیوی حکوومه‌ت چه‌ند جار به‌ ئاو تاوێکی سه‌یره‌وه‌ ڕایده‌گه‌یاند که‌ "ره‌زمه‌نده‌کانی ئیسلام چه‌ند به‌له‌می گه‌شتیی هێزه‌کانی ده‌ریایی  زیدی ئینقلابیان نوقمی ئاو کرد و هه‌موو چه‌کداره‌کانیان خنکاند". شته‌که‌ش دیار بوو حکوومه‌ت بۆ ئه‌وه‌‌ی لاوازی خۆی له‌به‌رابه‌ر هێزی پێشمه‌رگه‌ی کوردستاندا بشارێته‌وه‌، ده‌هات هێزی ده‌ریایی و ئاسمانی و تۆپخانه‌ و... شتی وای له‌ خه‌یاڵدا دروست ده‌کرد و پاشان ڕایده‌گه‌یاند که‌ ئه‌و هێزانه‌ی ته‌فر و توونا کردووه‌.

ئێسته‌ش ده‌سه‌ڵاتی تورکی هه‌مان رێباز و سیاسه‌ت ره‌چاو ده‌کات، تا خه‌ڵکه‌که‌ی خۆی و جیهان لێی نه‌پرسن ژمارێکی که‌م گه‌ریلا که‌ بێجگه‌ له‌ چه‌کی سووک یا ئاڕپی جێ و تیربار، هیچیتریان نییه‌، چۆنه‌ یه‌کێک له‌ ئه‌رته‌شه ‌به‌هێزه‌کانی ناتۆی وه‌زاڵه‌ هێناوه‌، بۆیه‌ ده‌بێ ژماره‌یان زیاد بکات و حه‌تمه‌ن وه‌ک حکوومه‌تی ئێران ،به‌خه‌یاڵ ده‌یانکاته‌ خاوه‌نی تۆپ و تانگ و‌هیزی ده‌ریایی و ئاسمانیش. به‌ڵام با دڵی خۆیان خۆش بکه‌ن، خه‌ڵک و به‌تایبه‌ت ئه‌وه‌ی پێشمه‌رگه‌ و گه‌ریلا گیانی خۆی بۆ فیدا ده‌کات باش ده‌زانێ رۆڵه‌کانی بێجگه‌ له‌ باوه‌ڕی پۆڵایین به‌ خه‌ڵک و ئازادیی نیشتمان و پشتیوانیی میلله‌ته‌که‌ی هیچ یار و پێشتیوانێکی نییه‌. دوژمن نازانێ که‌ ئه‌وه‌ چه‌کی بڕاویه‌ که‌ له‌هه‌موو چه‌کێک کاریگه‌رتره‌.