گۆشه‌ی ڕێزمانی کوردی

به‌شێکمان کردووه‌ته‌وه‌ بۆ ڕێزمان . هۆی سه‌ره‌کیی کردنه‌وه‌ی ئه‌م به‌شه‌، ئه‌و گۆڕانکارییانه‌یه‌ که‌ له‌م ساڵانه‌ی دواییدا چ له‌باری گه‌شه‌ی تێکنولوژی و چ له‌باری گه‌شه‌ی شعووری نه‌ته‌وه‌ییه‌وه‌ له‌ ناو گه‌له‌که‌ماندا هاتوونه‌ته‌ مه‌یدانه‌وه‌. ئه‌م ئاڵوگۆڕانه‌و و سه‌رجه‌م گۆڕانکارییه‌کانی تر، ئێـمه‌ی کوردی له‌ دونیای فه‌رامۆشییه‌وه‌ به‌ره‌و جیهانی سه‌رنج و بایه‌خدان گواسته‌وه‌. بۆیه‌ پێویسته‌ به‌ پێی ئه‌و گواستنه‌وه‌ش ئێمه‌ خۆمان و باقی دیارده‌کانی پێوه‌ندیدار  به‌ گه‌له‌که‌مانه‌وه‌‌، له‌گه‌ڵ ئه‌م گۆڕانکارییانه‌ ده‌ق بده‌ین.

یه‌کێک له‌و ئاستانه‌ی که‌ ده‌بێ له‌ گه‌ڵ ئه‌م گۆڕانکارییه‌دا ده‌ق بدرێ و نوێژه‌ن بکرێته‌وه‌ لێکۆڵێنه‌وه‌ و پێداچوونه‌وه‌ی نووسین و رێزمانی کوردی و ده‌قدانی له‌گه‌ڵ هه‌لومه‌رجی تازه‌ی ئیمڕۆ و پاراستنی له‌و هه‌ڵه‌ و نه‌زانینییه‌‌یه‌ که‌ به‌هۆی ده‌ست پێڕاگه‌یشتن به‌ ئینتێرنێت و فراوان بوونی قه‌ڵه‌م به‌ده‌ستی کوردی نه‌زانی هه‌ڕه‌مه‌ نووس تووشی کردووه‌.

ڕاسته‌ ڕێنووس و رێزمانی کوردی خاوه‌ن شه‌قڵ و ڕیبازی خۆیه‌. به‌ڵام به‌داخه‌وه‌ به‌هۆی ئه‌وه‌ی‌ که‌ تا ئێستا خاوه‌نی کیانی خۆمان نه‌بووین ئه‌م لایه‌نه‌ی زبانه‌که‌مان هێشتا خاوه‌نی ئیستاندارێکیێ کونکرێت نییه‌. ئاشکرایه‌ ئه‌و زبانه‌ ئیستاندارد و کونکرێته‌ش ده‌سه‌ڵات و کیانی نه‌ته‌وه‌یی پێکی دێنن. بۆیه‌ له‌به‌ر نه‌بوونی ئه‌و ئیستاندارده‌‌، هه‌رکه‌سه‌ و به‌که‌یفی خۆی له‌م مه‌یدانه‌دا ئه‌سپی خۆی تاو ده‌دات. ئه‌مه‌ ته‌نانه‌ت هه‌ردوو حیزبی ده‌سه‌ڵاتداریش ده‌گرێته‌وه‌.

به‌ڵام گه‌ر له‌ ڕاستیی زبانه‌که‌مان بڕوانین، ده‌بینین که‌ یاسا و ده‌ستووره‌که‌ی وه‌ک هه‌ر زبانێکی زیندووی ئه‌م گیتییه‌، دوور له‌ سه‌لیقه‌‌ی شه‌خسی، خاوه‌نی ڕێچکه‌ و رێبازێکی لۆژیکیی تایبه‌ت به‌خۆیه‌‌. واتا زبانی کوردیش وه‌ک هه‌ر زبانێکی دیکه‌ی ئه‌م جیهانه‌ خاوه‌نی رێزمان و رێچکه‌ و یاساکانی تایبه‌ت به‌خۆیه‌ و گرنگیی ئه‌م ده‌سکه‌وته‌ له‌وه‌ دایه‌ که‌‌ هه‌موو ئه‌مانه‌ له‌ سه‌رده‌می  بێ ده‌وڵه‌تی و بێ کیانیدا ، له‌ ژێر سه‌رکوت و نکۆڵیی داگیرکه‌ران، به‌هۆی زه‌حمه‌ت و زۆرجار مه‌ینه‌تی نوخبه‌ و نووسه‌ران و  رۆشنبیرانی نه‌ته‌وه‌که‌مانه‌وه‌، به‌تاوانێکی زۆره‌وه‌ ده‌سته‌به‌ر کراون.

له‌م ساڵانه‌ی دواییدا، گه‌رچی گه‌شه‌ی ئامرازه‌کانی پێوه‌ندی زۆر یارمه‌تیی گشتگر کردنی زبانه‌که‌مانی داوه‌ و به‌تایبه‌ت له‌و به‌شانه‌ی کوردستان که‌ کوردی نووسین و خوێندنه‌وه‌ ئازاد نییه‌،ژمارێکی زۆر هاونیشتمانی به‌هیمه‌تی خۆیان فێری خوێندنه‌وه‌ و نووسینی زمانی زکماکی بوون. به‌ڵام به‌داخه‌وه‌ هه‌ر ئه‌مه‌ش هێندێك په‌رش و بڵاوی و بێ سه‌ره‌و به‌ریی‌شی له‌گه‌ڵ خۆی هێناوه‌. شان به‌ شانی ئه‌مانه‌، به‌داخه‌وه‌ بوونی شه‌ڕی نێوخۆیی له‌ باشووری کوردستان و "باڵکانیزه"‌کردنی ئه‌م پارچه‌یه‌ی وڵاته‌که‌مان له‌ نیوان پارتی و یه‌کێتیدا، زیانی خۆی به‌گه‌شه‌ی زبانه‌که‌مان گه‌یاند. به‌شێوه‌یه‌ک که‌ ئه‌و به‌شه‌ی کوردستان بووه‌ خاوه‌ن دوو که‌ڵتوور و دوو شێوه‌ نووسینی کوردی. که‌ به‌داخه‌وه‌ زۆرتر له‌وه‌ی شوێنگری ڕاستییه‌کانی واقێعی زبانی کوردی بێ، شوێن هه‌ڵگری حیزبایه‌تی و ناوچه‌ گه‌رایی بوو. به‌شێوه‌یه‌ک که‌ کاریگه‌ریی ئه‌م ناوچه‌گه‌راییه‌ بۆ زیاتر له‌ 15 سال قورسایی که‌وته‌ سه‌ر خوێندگه‌ و مه‌کته‌به‌کان و ته‌نانه‌ت کار گه‌یشته‌ حیزبی کردنی وشه‌کانیش.

به‌خته‌وه‌رانه‌ ئێسته‌ ئه‌وه‌ له‌م به‌شه‌ی کوردستان نه‌ماوه‌ و ده‌سه‌ڵاتی کوردی بووه‌ته‌وه‌ به‌یه‌ک. بۆیه‌ چاوه‌روان ده‌کرێ ئیتر وشه‌ی کوردی به‌بێطه‌ مه‌یدانی ڕه‌قه‌به‌ریی حیزبی.

ئێمه‌ هه‌وڵده‌ده‌ین له‌م به‌شه‌ی ماڵپه‌ڕه‌که‌ماندا له‌ وتار و ده‌قی سه‌ربه‌خۆدا لایه‌نی ناڕاست و هه‌ڵه ڕێزمانییه‌کان به‌گوێره‌ی توانا و زانستی خۆمان بخه‌ینه‌ به‌ر باس و لێکۆڵینه‌وه‌ . تابه‌ڵکوو خزمه‌تێکی چکۆله‌مان به‌ ئه‌رکی نیشتمانیمان کردبێ.

ئێمه‌ لێره‌ به‌دواوه‌ له‌م به‌شه‌دا  چه‌وتی و هه‌ڵه‌ و ناڕاستیانه‌ی رێنووس و ڕیزمانی کوردی (له‌ ڕوانگه‌ی خۆمانه‌) ده‌خه‌ینه‌ به‌ر دید و قه‌زاوه‌تی ئێوه‌. دیاره‌ ئه‌وانه‌ی‌ که‌باسی ده‌که‌ین هیچ ئیدیعایه‌مان له‌ سه‌ری نییه‌ و ته‌نیا بۆ کردنه‌وه‌ ده‌روازه‌ی لێکۆڵینه‌وه‌ قسه‌و ‌باسی زۆرتر و له‌ ئه‌نجامدا خزمه‌ت به‌ رێنووس و ڕێزمانه‌که‌مان ده‌بێ. هیوادارین ئێوه‌ش توانایی و زانسته‌کانتان له‌م بواره‌دا وه‌گه‌ڕ بخه‌ن و هاریکارمان بن

ئێمه‌ هه‌وڵده‌ده‌ین له‌م به‌شه‌دا هه‌ر بابه‌تێک به‌شێوه‌ی جیاواز و تایبه‌ت بنووسین. واتا له‌ هه‌ر نووسینێکدا باسی لایه‌ن و چه‌م و خه‌مێکی ڕێنووسی یا رێزمانی ده‌که‌ین. ئاشکرایه‌ مه‌یدانی نه‌زه‌ردانیش له‌سه‌ر هه‌ر بابه‌تێک ئاواڵه‌ دێڵێنه‌وه‌ و بۆچوونه‌ جیاوازه‌کان یش گه‌ر دوور له‌ لۆژیک و مه‌نتێق نه‌بن، بڵاو ده‌که‌ینه‌وه‌.

چاوه‌روانی هاوکاریتانین

ده‌سته‌ی به‌ڕێوه‌به‌ریی ماڵپه‌ڕی هه‌ڵوێست

 گه‌ر بۆچوونێکت هه‌یه‌ ئێره‌ کلیک بکه