یه‌ک له‌و ناوه‌ندانه‌ی که‌ ئه‌و کرده‌وه‌یه‌ مه‌حکووم کردووه‌، ناوه‌ندی "چاک"ه‌. ئه‌م ناوه‌نده‌ به‌ ده‌رکردنی ڕاگه‌یه‌ندراو که‌ ده‌قه‌که‌ی بۆ هه‌ڵوێست ناردووه‌ ،داخستنی بنکه‌کانی پارتی چاره‌سه‌ری به‌ کردارێکی نادێموکراتی زانیوه‌ و ئه‌و هه‌ڵوێسته‌ی حکوومه‌تی هه‌رێمی کوردستانی به‌ هه‌وڵدان بۆ به‌ربه‌ست کردنی دێموکراسی و ئازادیی تێکۆشانی سیاسی هه‌ڵسه‌نگاندووه‌ و داوای کردووه‌ هه‌رچی زووتر ئه‌و به‌ربه‌ستیه‌ له‌مه‌ر ئه‌و پارته‌ هه‌ڵبگیرێت و بنکه‌ و ناوه‌نده‌کانی بکرێنه‌وه‌. ئه‌م ناوه‌نده‌ هه‌روه‌ها له‌ ڕاگه‌یه‌ندراوه‌که‌ی خۆیدا داوای پاراستنی حورمه‌تی ئازادی تێکۆشانی سیاسیی کردوه‌.

هه‌ر له‌م پێوه‌ندیه‌دا ماڵپه‌ڕی هه‌وێست به‌پێویست ده‌زانێ ڕابگه‌یه‌نێت که‌ به‌پێی به‌راوه‌ردکردنی قورسایی هێزه‌کان و ئه‌و زه‌خت و زۆره‌ی که‌ ئه‌مڕۆ له‌سه‌ر باشووڕی کوردستان به‌گشتی و ده‌سه‌ڵاتی ئه‌م به‌شه‌ی کوردستان به‌تایبه‌تی هه‌یه‌، داخستنی بنکه‌کانی  پارتی چاره‌سه‌ر ده‌بێ به‌ ته‌وافق له‌ گه‌ڵ ئه‌و پارته‌ و بۆ پاراستنی به‌رژه‌وه‌ندیه‌کانی باڵای نه‌ته‌وه‌یی و پاراستنی هه‌رێمی کوردستان بێت. که‌ ئه‌ویش ده‌بێ حاڵه‌تێکی فورمالیته‌ و روواڵه‌تی بێت و ئه‌و پارته‌ به‌هیچ شێوه‌یه‌ک له‌ مه‌یدانی کرده‌وه‌دا پێش به‌ چالاکیی نه‌گیرێت. ته‌نیا له‌ رێککه‌وتنێکی ئه‌وتۆدایه‌ که‌ ئه‌و کرداره‌ی حکوومه‌تی هه‌رێم له‌مه‌ڕ داخستنی بنکه‌کانی پارتی چاره‌سه‌ر ده‌توانرێ پاساوی هه‌بێت و نه‌بێته‌ جێی ئیعتراز.

بێگومان رێککه‌وتنێکی ئه‌وتۆ ئه‌وه‌ ده‌سه‌لمێنێ که‌ ئیمرۆکه‌ و له‌م هه‌لومه‌رجه‌دا که‌ ده‌وڵه‌تی تورکییه‌ خۆی مه‌ڵاس داوه‌ تا په‌لاماری باشور و ده‌سه‌ڵاته‌که‌ی بدات و له‌ کاتێکدا که‌ ده‌وڵه‌تانی ده‌ور وبه‌ریش زۆرتر دنه‌ی تورکییه‌ بۆ هیرش ‌هینانه‌ سه‌ر ئه‌م ده‌سکه‌وته‌ی نه‌ته‌وه‌ییه‌ ده‌ده‌ن و حکوومه‌تی ئامریکاش که‌وتووه‌ته‌ لامه‌ لامه‌ کردنی تورکان، تێکۆشه‌رانی کورد بۆ پێشگرتن له‌ په‌لاماری داگیرکه‌ران، ئاماده‌ن ته‌نانه‌ت له‌ مافی تێکۆشانی سه‌ربه‌ستانه‌ی خۆیان چاو پۆشی بکه‌ن. بێگومان هه‌ڵوێستێکی ئه‌وتۆی پارتی چاره‌سه‌ر، نیشانه‌ی هه‌ست به‌ په‌رپرسایه‌تی و ئیلتیزام به‌به‌رژه‌وه‌ندیه‌باڵاکانی نه‌ته‌وه‌ییه‌ و جێگه‌ی رێز و پێزانین.