گه‌رچی دربڕینی ئه‌و هه‌ڵوێسته‌ی خانمی ڕایس جێگه‌ی سه‌رسووڕمان نییه‌ و به‌پێی سروشت و ڕابردووی ئامریکا چاوه‌روانکراو بوو، به‌ڵام وا وێده‌چێ چه‌قین له‌ گێژاوی داگیرکاریی ئێراق و ئه‌فغانستان، سیاسه‌تی ئامریکای له‌ ئاست زۆر کێشه‌ و له‌وانه‌ له‌ پلانه‌ درێژخایانه‌کانه‌وه‌ گواستوه‌ته‌ بۆ پراگماستیزمێکی هه‌لپه‌رستانه‌، که‌  تادێت له‌ هه‌لومه‌رجی سه‌رده‌می شه‌ڕی ڤییه‌تنام و شکست و شه‌رمه‌زارییه‌ مێژووییه‌‌که‌ی ئه‌و سه‌رده‌مه‌ نزیک ده‌بێته‌وه‌.

ئه‌و هه‌ڵوێسته‌ی وه‌زیری ده‌ره‌وه‌ی ئامریکا له‌ چه‌ند لایه‌نه‌وه‌ جێگه‌ی ڕامانه‌. یه‌که‌م ئه‌وه‌ی که‌ ده‌سه‌ڵاتی کوردی ده‌بێ باش بزانێ که‌ ئیمـرۆ له‌ ژێر فشاری تورکییه،بزووتنه‌وه‌ی کورد له‌‌ باکووڕ ده‌بێته‌ دوژمن ی ئامریکا. بۆیه‌ ئه‌گه‌ری ئه‌وه‌ش دوور نییه‌ که‌ خانمی ڕایس یا ئاغای بووش به‌پێی هه‌لومه‌رجی ئێراق و ده‌ربازبوون له‌م بون به‌سته‌ی تێ چه‌قیون و بۆ ڕاگرتنی به‌رژه‌وه‌ندی خۆیان باشووریش به‌‌ تێروریست ناو ببه‌ن و موقته‌دا سه‌رد به‌ دۆست و هاوپه‌یمان . یا له‌ مه‌عامله‌ له‌گه‌ڵ داگیرکه‌ران، به‌تایبه‌ت تورکییه‌ و ئێران( که‌ له‌ ئێراق ریشی له‌ گره‌وی ئه‌م دوو وڵاته‌دایه‌)، جووڵانه‌وه‌ی کورد به‌گشتی بخه‌نه‌ خانه‌ی تێروریستی و له‌ ئه‌نجامدا ئاواڵه‌ هێشتنی ده‌ستی داگیرکه‌ران بۆ سه‌رکوتی خوێناویی نه‌ته‌وه‌که‌مان.

بۆ روودانی سیناریویه‌کی ئه‌وتۆ ، ئامریکا رابردوویه‌کی باشی نییه‌‌ و ئه‌وه‌ی له‌ ڕابردوو له‌ ئاست نه‌ته‌وه‌ی کورد نیشانی داوه‌، بێجگه‌ له‌ دوژمنایه‌تی و فرۆشتنی به‌ به‌رژه‌وه‌ندیه حه‌قیرانه‌‌کانی خۆی، هیچی تر نه‌بووه‌. نموونه‌ی زیندوو بۆ ئه‌م ئیدیعایه‌ پشتیوانی کردنی حه‌مه‌ ڕه‌زاشای لاوازی پاش شه‌ری دووه‌می جیهانی  بۆ سه‌رکوتی کۆماری کوردستان و رووخاندنی یه‌که‌م کۆماری کوردی له‌ مێژوودا و به‌تایبه‌ت له‌سێداره‌دانی رێبه‌رانی کۆمار و له‌ سه‌رووی هه‌موویانه‌وه‌ قازی موحه‌مه‌د. پاشتر به‌شداریی ئیتڵاعاتی- راوێژکاریی(موسته‌شاری نیزامی) له‌ سه‌رکوتی جوولانه‌وه‌ی 46-47 ی رۆژهه‌ڵاتی کوردستان که‌ ئه‌نجامی رژانی خوێنی ده‌یان رۆڵه‌ی تێکۆشه‌ری نه‌ته‌وه‌که‌مان و شکستی ئه‌و جوولانه‌وه‌ بوو. له‌ هه‌مووی گرینگتر، هه‌رس هێنان به‌ شۆڕشێ ئه‌یلوول وه‌ک گه‌وره‌ترین و گاریگه‌رترین ڕاپه‌رین و بزووتنه‌وه‌ی رزگاریی خوازی کورد له‌ باشووری کوردستان و سه‌ره‌نجام هاریکاریکردنی ده‌سه‌ڵاتی تورکیه‌ له‌ سه‌رکوتی بزووتنه‌وه‌ی هه‌قخوازانه‌ی نه‌ته‌وه‌که‌مان له‌ باکوور بۆ ماوه‌ی زیاتر له‌ 20 ساڵ .که‌ هێشتاش به‌رده‌وامه‌.

به‌و هه‌موو ئه‌زموونه‌ تاڵانه‌وه‌ که‌ نه‌ته‌وه‌که‌مان له‌ ئیمپریالیزم و ئامریکا به‌تایبه‌تی هه‌یه‌تی، و به‌و سه‌رکوت و قه‌لاچۆیه‌ی که‌ داگیرکه‌ران به‌ پشتیوانی و چه‌ک و چۆڵی زلهێزان ده‌ر هه‌ق نه‌ته‌وه‌که‌مان کردوویانه‌، گه‌لی ئێمه‌ هیچ کات بواری خه‌باتی نه‌چووه‌ته‌ فازی تێروریستی و فڕۆکه‌‌ دزین و دیپلومات کوشتن و ته‌قاندنه‌وه‌ و خۆ ته‌قاندنه‌وه‌. که‌چی له‌ به‌رابه‌ردا هه‌میشه‌ به‌ تێروریست و خراپکار و موخه‌ڕب ناوزه‌د کراوین و له‌ هه‌موو ئه‌م دونیایه‌ تاقه‌ هێز و که‌سێک نه‌بووه‌ لایه‌کمان لێبکاته‌وه‌. به‌ڵام سه‌ره‌ڕای هه‌موو ئه‌وانه‌ و پاش لانی که‌م 100 ساڵ دزینی سامانی نیشتمانه‌که‌مان و سه‌رکوت و وێران کردن و ته‌عریب و ته‌هجیر و ته‌رحیل و گرتن و زیندان و ئیعدام و دواکه‌وتوو ڕاگرتن، هێشتا هه‌ر ماوین و له‌ کاتیکدا له‌م ماوه‌دا به‌ جیدی هه‌وڵی توانه‌وه‌ی یه‌کجاریمان دراوه‌، ئێسته‌ له‌هه‌موو کاتێک به‌ وزه‌تر و جه‌ماوه‌ری‌تر هاوار ده‌که‌ین: کورد زیندووه‌ و تا "دیاریکردنی چاره‌نووسی به‌ده‌ستی خۆی" هه‌دا نادات.

له‌ چه‌ند ده‌یه‌ی ڕابردوودا که‌ نه‌ وشیاریی نه‌ته‌وه‌ی له‌ ئاستی ئێستادا بوو و نه‌ هه‌لومه‌رجی جیهانی و ئامرازه‌کانی پێوه‌ندی و گه‌شه‌ی تێکولۆژی له‌م ئاسته‌دا بوو و ئه‌م جیهانه‌ له‌ دوو جه‌مسه‌ردا کۆکرابوه‌وه‌ و دیکتاتۆران له‌ خه‌فا و بێ ده‌نگ کوشتاریان ده‌کرد و زل‌هیزان پشتیوانیان ده‌کرد، نه‌ته‌وه‌ی کورد بێ‌یار و پشتیوان خۆی گه‌یانده‌ ئه‌‌مڕۆ و نه‌توایه‌وه‌. بۆیه‌ ئێسته‌ ئیتر له‌ هه‌ڕه‌شه‌ی داگیرکه‌ران و پشتیوانه‌کانیان هیچ باکێکی نییه‌ و درێژه‌ به‌ خه‌بات و مافخوازی ده‌دات. به‌ڵام له‌م سه‌رده‌مه‌دا، دوژمنانی نه‌ته‌وه‌که‌مان ده‌بێ بزانن که‌ گه‌لی کورد سه‌بر و خۆڕاگریی سنووری هه‌یه‌ و ئیسته‌ ئیتر ئه‌وه‌ ده‌سه‌ڵاتدارانن که‌ کون و که‌له‌به‌ر و که‌لێنی زه‌ربه‌خواردنیان زۆرتره‌. ئێمه‌ له‌سه‌ر خاک و نیشتمانی خۆمانین و ئه‌وه‌ی په‌لامارمان بدات و ئه‌وه‌ی یارمه‌تی په‌لامارده‌ران بدات ده‌بێ چاوه‌روانی ئه‌وه‌ش بکات که‌ نه‌ته‌وه‌ی کورد به‌پێی بڕیاری جاڕنامه‌ی نێونه‌ته‌وه‌یی مافه‌کانی مرۆڤ، به‌ که‌ڵک وه‌رگرتن له‌ هه‌ر ئیمکانێک له‌خۆی دیفاع بکات.