له‌ کاتێکدا هه‌ر له‌ کاتی پێک‌هاتنی ده‌وڵه‌تی ئیسرائیل و سه‌رهه‌لدانی کێشه‌ی فه‌له‌ستین، ده‌وڵه‌تانی عه‌ره‌بی و خه‌ڵکانێکی زۆر له‌ روانگه‌ی شه‌ڕی جووله‌که‌ و موسوڵمانه‌وه‌ چاویان له‌ کێشه‌که‌ ده‌کرد، جورج حه‌به‌ش هه‌ر ئه‌و کاته‌ی که‌ خوێندکاری  بواری پزشکی بوو، وه‌ک چالاکێکی ڕزگاریی فه‌له‌ستین له‌گه‌ڵ تێکه‌ڵ کردنی کێشه‌ی فه‌له‌ستین له‌گه‌ڵ ئایینی ئیسلام دژایه‌تی ده‌کرد و هه‌وڵی سه‌ره‌کیی ئه‌وه‌بوو که‌ بزووتنه‌وه‌ی فه‌له‌ستین  سێکۆلار بمێنێنی. جورج حه‌به‌ش خۆی وه‌ک چه‌پ ده‌ناساند  و بۆ ماوه‌یه‌کی دوور و درێژ رێکخراوه‌که‌ی(PFLP)  که‌ یه‌کێک له‌ توندره‌ترین و ڕادیکاڵترین رێکخراوه‌کانی ناو رێکخراوی ئازادیخوازی فه‌له‌ستین(PLO) بوو، پاش رێکخراوی "فه‌تح" به‌ رێبه‌ریی یاسه‌ر عه‌ره‌فات، به‌هێزترین و پر جه‌ماوه‌رترین رێکخراوی فه‌له‌ستینی بوو و ده‌وری کاریگه‌ری له‌ بزووتنه‌وه‌ی گه‌لی فه‌له‌ستین‌دا هه‌بوو.

گه‌رچی له‌ سه‌رده‌مێکدا و به‌هۆی وه‌زعیه‌تی سیاسه‌تی جیهانیی ئه‌و ده‌م جورج حه‌به‌ش و هه‌ر به‌و پێ‌یه‌ش رێکخراوه‌که‌ی له‌ چالاکیی خۆیاندا تێکه‌ڵ به‌ کاری تێروریستی بوون، به‌ڵام پاشتر به‌ته‌واوی کاری تێروریستیی وه‌لانا و سه‌ره‌نجام به‌ پێچه‌وانه‌ی زۆر رێبه‌ریی وڵاتانی نادێموکرات و شه‌رقی ، له‌ لووتکه‌ی ده‌سه‌ڵاته‌وه‌ خۆخوازانه‌ ،خانه‌نشینی هه‌ڵبژارد و رێکخراوه‌که‌ی به‌ نه‌سڵێ پاش خۆی سپارد.

حه‌به‌ش که‌سێکی لائیک و غه‌یر مه‌زهه‌بی بوو به‌ڵام له‌ بنه‌ماڵه‌یه‌کی کریستیانی (مه‌سیحی) له‌دایک ببو.  هیچکات ڕێککه‌وتنامه‌ی "ئوسلۆ"ی قه‌بووڵ نه‌کرد و هه‌ر بۆیه‌ش سه‌ره‌ڕای ئه‌وه‌ زۆر داوای لێکرا بگه‌ڕێته‌وه‌ ناوچه‌ فه‌له‌ستینیه‌کان، قه‌بووڵی نه‌کرد. هه‌میشه‌ ده‌یکوت من ته‌نیا کاتێک ده‌گه‌ڕێمه‌وه‌ فه‌له‌ستین که‌ هه‌موو ئاواره‌ فه‌له‌ستینیه‌کان  بتوانن  بگه‌رێنه‌وه‌. جا ئه‌وکات که‌سێک نه‌یویست بگه‌رێته‌وه‌ ، که‌یفی خۆیه‌.

جورج حه‌به‌ش له‌ دوایین کتێبی دا به‌ناوی "شۆڕشگێڕان قه‌ت نامرن"  که‌ مانگی ڕابردوو له‌ فه‌رانسه‌ چاپ و بڵاو کرایه‌وه‌، بۆ ده‌سته‌به‌ر بوونی ئاشتی و ته‌بایی، له‌ سه‌ر سێکۆلار بوونی ناوچه‌ پێداده‌گری و به‌ ڕاشکاوی چاره‌سه‌ریی کێشه‌ی ئیسرائیل و فه‌له‌ستین له‌ پێکهاتنی ده‌وڵه‌تێکی سێکۆلار و غه‌یر مه‌زهه‌بی‌دا ده‌بینی که‌ جووله‌که‌ و فه‌له‌ستینی خاوه‌ن مافی یه‌کسان بن. ئه‌ڵبه‌ت هه‌ر له‌و کتێبه‌دا ئه‌وه‌ش ناشارێته‌وه‌ که‌ ئه‌وه‌ی ده‌ری ده‌بڕێ( به‌و که‌ش و هه‌وایه‌ که‌ له‌ گۆڕێدایه‌) زۆرتر ره‌نگی رومانتیسمی پێوه‌ دیاره‌.  به‌ڵام له‌ کۆتاییدا به‌ ڕاشکاوی ده‌ڵی که‌ سه‌ره‌نجام فه‌له‌ستین و ئیسرائیل ده‌بێ به‌وه‌ بگه‌ن که‌ ته‌نیا رێگه‌چاره‌ به‌ئاشتی پێکه‌وه‌ ژیانه‌ و هیچی دیکه‌.