وه‌ک ده‌زانین ئه‌مه‌ یه‌که‌م هێرشی تێروریستی بۆ سه‌ر هاونیشتمانانی یه‌زیدی نییه‌ و له‌ مانگی چواری ئیمساڵ(ئاوریل) دا له‌ په‌لامار بۆ سه‌ر ئوتووبووسێک، چه‌کدارانی ئه‌لقاعیده‌ هه‌موو موسافیره‌کانی ئه‌و ئوتووبووسه‌ که‌ ئێزیدی بوون دابه‌زاند و زۆر درندانه‌ به‌ر ده‌سرێژی چه‌که‌کانیاندان و هه‌موویان که‌ 23 که‌س بوون کوشتن.

گه‌رچی ئه‌وکات پێویستی پاراستنی هاونیشتمانانی کوردی ناوچه‌دابراوه‌کان له‌ باشووری کوردستان و به‌تایبه‌ت هاونیشتمانانی ئێزیدی به‌باشی هه‌ستی پێده‌کرا، به‌ڵام به‌داخه‌وه‌ هیچ لایه‌ک له‌مباره‌وه‌ هه‌نگاوی هه‌ڵنه‌گرد. واتا چ حکوومه‌تی ئێراق که‌ ئێسته‌ به‌رپرسایه‌تیی ڕاسته‌وخۆی له‌ پاراستنی گیانی دانیشتوانی ناوچه‌ کوردنشینه‌کانی دابڕاو له‌ باشووری کوردستانی له‌ ئه‌ستۆدایه‌ و چ حکوومه‌تی هه‌رێم ،سه‌ره‌ڕای ئه‌وه‌ی هه‌ڕه‌شه‌ی لایه‌نه‌کانی دژ به‌ نه‌ته‌وه‌ی کوردیان ده‌دیت و چه‌ند جاریش به‌ کوشتنی خه‌ڵکی بێتاوان نیشانیان دابوو که‌ چاوی دیتنی کوردیان نییه‌،به‌ڵام هه‌نگاوێکی ئه‌وتۆ بۆ پاراستنی کوردانی دابڕاو ئه‌نجام نه‌درا. هه‌ر ئه‌وه‌شه‌ که‌ کاری تێروریستی له‌م ناوچانه‌ به‌ئاسانی ئه‌نجام ده‌درێت.

به‌ڕاستی ئه‌گه‌ر سه‌ره‌تایی‌ترین سیسته‌می پارێزگاری له‌ ناوچه‌ی شه‌نگاڵ بوایه‌،ئایا چوار کامیون(لۆری)ی پڕ له‌ دینامیت و ته‌قه‌مه‌نی به‌ئاسانی ده‌یانتوانی دزه‌ بکه‌نه‌ ئه‌و شارۆچکه‌ و گوندانه‌ و ئه‌و خه‌ڵکه‌ بێتاوانه‌ قه‌ڵاچۆ بکه‌ن؟

به‌ باوه‌ڕی ئێمه‌، ئێسته‌ که‌ حکوومه‌تی ناوه‌ندیی ئێراق توانای پاراستنی گیانی هاونیشتمانانی کوردی دابڕاوی نییه‌، ئه‌رکی حکوومه‌تی هه‌رێمی کوردستانه‌ که‌ ڕاسته‌وخۆ بێته‌ مه‌یدان و پاراستنی گیانی هاونیشتمانانی کوردمان له‌و ناوچانه‌ وه‌ئه‌ستۆ بگرێت.

ئه‌وپه‌لاماره‌ و ئه‌و کوشتاره‌ به‌کۆمه‌ڵه‌ی که‌ له‌ناوچه‌ دابراوه‌کان دژی هاونیشتمانانی کوردمان به‌ڕێوه‌ده‌چی ،ئه‌و ڕاستییه‌مان پێ ده‌سه‌لمێنێ که‌ جێ به‌ جێ کردنی "ماده‌ی 140" پێویستیه‌کی زه‌رووره‌ و به‌هیچ شێوه‌یه‌ک نابێ دوا بخرێت.