لەم هێرشەدا که‌سێک که‌ میوان بوو و به‌هیچ شێوه‌یه‌ک به‌شداری مانگرتنی زانکۆی تاران نه‌بوو، (عێزه‌تی ئیبراهیم نێژاد) گیانی له‌ده‌سدا و به‌ سه‌دان خوێندکاریش بریندار ویا ده‌ست و پێیان ورد و خاش بوو(به‌ هۆی فڕه‌دانیان له‌ باڵه‌خانه‌وه‌ ) و ژماره‌یه‌ک زۆر خوێندکاریش گیران و هێشتاش ژماره‌یه‌کیان له‌ زیندان دان.

 بەدوای ئەم رووداوە و بۆ پشتیوانی لە خوێندکارانی زانکۆی تاران، خوێندکارانی سەرتاسەری ئێران خۆپیشاندانیان به‌رینترکرد و نارەزایەتیان دەربری، نارەزایەتی خوێندکاران بە تایبەت لە شاری تاران کێشرایه‌ ده‌ره‌وه‌ی زانکۆ و لەگەل پشتیوانی خەلک بەرو روو بوو. هاتنی خەلک بۆ سەر شەقامەکان و رق وبێزاری له‌ حکوومه‌ت کە لەم جۆش و خرۆشه‌ دا بەدی دەکرا، هێزەکانی حکوومه‌تی غافڵگیر کرد. به‌تایبه‌ت له‌م رۆژانه‌دا شه‌پۆلێکی نافه‌رمانیی مه‌ده‌نی به‌ناوی "بۆق"(هوڕن)لێدانی ماشێنه‌کان و رێبه‌ندانی خیابانه‌کان که‌وته‌ رێگه‌. به‌شێوه‌یه‌ک ده‌یان هه‌زار شیشه‌ی ئوتوموبیل له‌لایه‌ن به‌کرێگیراوانی حکوومه‌ته‌وه‌ ورد و خاش کران.

له‌ درێژه‌ی ئه‌و ئیعترازانه‌دا ، چەند ناوچەیەکی شاری تاران شه‌وان بۆ چەندین سەعات لە کۆنترۆلی هێزە نیزامی و ئەمنەتیەکان ده‌ر ده‌چوو و خه‌ڵک به‌تایبه‌ت لاوان کونتڕۆلیان به‌ده‌سته‌وه‌ ده‌گرت. به‌ڵام سه‌ره‌نجام به‌ خه‌یانه‌تی ئیسڵاح ته‌ڵه‌به‌کان و رژاندنی سه‌دان هه‌زار هێزی سه‌رکوتگه‌ر و گرتنه‌ پێشی رێبازێکی دڕندانه‌‌ی گرتن و لێدان و سه‌رکوت، حکوومه‌ت توانی به‌سه‌ر وه‌زعه‌که‌دا زاڵ بێت و پاش چه‌ند رۆژ، راپه‌ڕینی 18ی پووشپه‌ڕ شکستی هینا.

ڕه‌نگدانه‌وه‌ی ئەم رووداوە لە ئاست جیهانیدا ،بووه‌ هۆی وه‌ڕێ که‌وتنی شه‌پۆلێکی جیهانیی ئێرانیانی ده‌ره‌وه‌ی وڵات و له‌ زۆربه‌ی وڵاتانی رۆژئاوا له‌ پێش باڵوێزخانه‌کانی ئێراندا رێپێوان و خۆپیشاندانی ئێعترازیی جه‌ماوه‌ری به‌ڕێوه‌چوو.

ئه‌م رووداوه‌ ده‌بێ وه‌ک خاڵێكی وه‌رچه‌رخان له‌ هه‌ڵوێستی بزووتنه‌وه‌ی خوێندکاری چاوی لێبکرێ. لێره‌ به‌دواوه‌یه‌ که‌ "ئیسڵاح‌ته‌ڵه‌به‌کان" ده‌ستیان روو ده‌بێ و خاته‌می به‌ته‌واوی لای رووناکبیرانی ناوخۆوه‌ ریسوا ده‌بێ. لێره‌ به‌دواوه‌یه‌ که‌ "ده‌فته‌ری ته‌حکیمی وه‌حده‌ت"  حیسابی کاژ ده‌خات و ئه‌و رێکخراوه‌ خوێندکارییه‌ که‌ سه‌رده‌مانێک گۆپاڵی ده‌ستی ئاخونده‌کان و دژی ڕادیکاڵیزمی خوێندکارانی دیکه‌ که‌ڵکی لێوه‌ر ده‌گیرا، به‌ته‌واوی له‌ حاکمییه‌ بڕا. هه‌ر ئه‌وه‌شه‌ که‌ ده‌بینین ئه‌مڕۆ هه‌موو ئه‌ندامانی ده‌سته‌ی به‌ڕێوه‌به‌ریی ئه‌م ناوه‌نده‌ خوێندکارییه‌ ، له‌لایه‌ن هێزه‌ ئه‌منیه‌تییه‌کانه‌وه‌ ده‌ستگیر ده‌کرێن.

سایتی هه‌ڵوێست وێڕای پشتیوانی له‌ داخوازه‌ ئینسانی و دێموکراتیکه‌کانی خوێندکارانی ئێران و هه‌وه‌ها پشتیوانی له‌ خواسته‌ نه‌ته‌وه‌ییه‌کانی خوێندکارانی کورد، به‌ رێز حورمه‌ته‌وه‌ یادی 18ی پووشپه‌ڕ ده‌کاته‌وه‌.