ئێمه‌ هه‌ر ئه‌و ده‌م له‌ وه‌ڵامێکی مه‌نتێقی و دوور له‌ هات و هاواردا وه‌ڵامی ئه‌و شالاوه‌ پروپاگه‌نده‌ییه‌مان دایه‌وه‌ که‌ پێشوازیی که‌م وێنه‌ی توێژی رۆشنبیری ناوه‌ و ده‌وه‌ی کۆمه‌ڵه‌ی به‌دواوه‌ بوو. هه‌ر ئه‌وه‌ش(ئه‌و پێشوازییه‌) بۆ ئێمه‌ گه‌وره‌ترین پاداش بوو. چوونکه‌ ده‌یسه‌لماند ئه‌و رێگه‌ی گرتوومانه‌ته‌ پێش به‌ پێچه‌وانه‌ی ئیدیعای هێندێک بیری ساویلکانه‌، نه‌ک هه‌ر "ده‌ستێوه‌ردان له‌ کاروباری نێوخۆیی کۆمه‌ڵه"‌ نییه‌، به‌ڵکوو دیفاعی شێلگیرانه‌ له‌ ئازادیی ده‌ربرین و مافی تاکه‌کان و بڵاوکردنه‌وه‌ی ده‌نگه‌ جیاوازه‌ بێ ئێمکانه‌کانه‌ و له‌ ئه‌نجامدا به‌ قازانجی کۆمه‌ڵه‌‌ و بزووتنه‌وه‌ی ڕزگاری- نیشتمانیی گه‌له‌که‌مانه.

هه‌ر ئه‌وکات ئێمه‌ ده‌مانزانی که‌ ئه‌و به‌ربه‌ره‌کانیه‌ که‌ دژی ئه‌و هه‌نگاوه‌مان ده‌کرێ، هه‌ڵقوڵاوی بیری کونسێرڤاتیڤانه‌یه‌ که‌ توانای هه‌زمی نوێگه‌رایی نییه‌. ده‌شمانزانی به‌ بوونی جیهانی ئازادی ڕاگه‌یه‌نه‌ره‌کان و به‌تایبه‌ت ئینتێرنێت، ئه‌و به‌ربه‌ره‌کانێ‌یه‌ په‌له‌قاژه‌یه‌ له‌ ناهومێدیدا و دێر یا زوو ناچار ده‌بێ(سه‌ره‌ڕای پێ‌ناخۆش بوونی) له‌به‌رابه‌ری ڕاستیه‌کاندا ته‌سلیم بێت و مل به‌و هه‌قێقه‌ته‌ بدات که‌ دونیا وه‌ک ڕابردوو نه‌ماوه‌. ئاخر ئه‌وه‌ نییه‌ خۆی له‌ ده‌سته‌که‌و‌ته‌کانی کۆمه‌ڵگه‌ی مرۆڤایه‌تی که‌ڵک وه‌رده‌گرێ! ئیتر چۆن چاوه‌روانه‌ لایه‌نی به‌رانبه‌ر یا لایه‌نه‌کانی دیکه‌ که‌ڵکی لێوه‌رنه‌گرن؟!

ئه‌وه‌ ماوه‌یه‌که‌ هه‌موو ماڵپه‌ڕ و وێبلاگه‌کانی سه‌ربه‌ زۆرینه‌ی کومیته‌ی ناوه‌ندیی کۆمه‌ڵه‌ له‌ پاشه‌کشه‌یه‌کی خشکه‌یی و ڕانه‌گه‌یه‌ندراودا، به‌ره‌ به‌ره‌ که‌وتوونه‌ بڵاو کردنه‌وه‌ی ئه‌و بابه‌تانه‌ی که‌ تا دوێنێ به‌هۆی بڵاوکردنه‌وه‌یان، "ماڵپه‌ڕی هه‌ڵوێست"یان  پێ ته‌کفیر ده‌کرد. دیاره‌ مه‌به‌ست ئه‌و نووسراوه‌ یا بابه‌تانه‌یه‌ که‌ نووسه‌ره‌کانی بۆیان ده‌ینێرن. ئه‌ڵبه‌ت‌ ئه‌و نووسه‌رانه‌ هه‌میشه‌ نووسینه‌کانی خۆیان بۆ ده‌ناردن، به‌ڵام به‌هۆی ئه‌وه‌‌ی ده‌ستووری ته‌حریمیان درابوو، بۆیان بڵاو نه‌ده‌کردنه‌وه‌. له‌ هه‌ر حاڵه‌تێکدا ئه‌وهه‌نگاوه‌ گه‌ر به‌ تێگه‌یشتنه‌وه‌ بێت و "تاکتیک" نه‌بێت ، ده‌توانێ بۆ ئێمه‌ و بۆ کۆمه‌ڵگه‌که‌مان ده‌ستکه‌وتێک بێت، که‌ رێکخراوێکی سیاسی له‌ کێشه‌ ناوخۆییه‌کانی دا، له‌ باتی سه‌رکوت یا ده‌رکردن و ته‌حریمی جیابیران ، ڕیبازی ته‌حه‌مول و مودارا بگرێته‌ پێش.

ئێمه‌به‌ بێ ئه‌وه‌ی قسه‌ و هه‌ڵوێسته‌کانی دوێنێ ئه‌و به‌ڕیزانه‌ به‌چاویاندا بده‌ینه‌وه‌، وێڕای پێشوازیی له‌و گۆڕانه‌‌ی که‌ له‌و ماڵپه‌ڕانه‌دا به‌ نیسبه‌ت هاورێانی خۆیانه‌وه پێش هاتووه‌‌، هیوادارین ئه‌م گۆڕانه‌ له‌ رووی باوه‌ڕ به‌ دیموکراسی و ئازادیی ده‌ربڕینه‌وه‌ بێت، نه‌ک  شه‌قی زه‌مان و هه‌نگاوه‌ ئوسوولیه‌که‌ی ئێمه‌ به‌سه‌ریدا سه‌پاندبێتن.