بۆ پێشبردنی ئه‌م سیاسه‌ته‌ حکوومه‌ت له‌ رێگه‌ی وه‌زاره‌تی ئیتڵاعاته‌وه‌ "ده‌ستوورالعمل" ی فشار و زوخت و زۆر و کونتڕۆلی زۆرتری به‌ هه‌موو به‌کرێگیراوانی ئاشکرا و نهێنی خۆی ناردوه‌. زانیارییه‌کان ئه‌وه‌ ده‌ڵێن که‌ حکوومه‌ت تا دێت، هه‌ست به‌ لێدانی خۆی له‌ لایه‌ن ئامریکاوه‌ زۆرتر ده‌کات و به‌و پێیه‌ش تا دێت خۆی زۆرتر بۆ ئه‌گه‌رێکی وا ئاماده‌ ده‌کات. سیاسه‌ت داڕێژه‌رانی حکوومه‌ت لێکدانه‌وه‌یان ئه‌وه‌یه‌ که‌ گه‌ر بێت و به‌ر په‌لاماری ئامریکا بکه‌ون، ناوچه‌کانی وه‌ک کوردستان و به‌لووچستان و ئه‌حواز‌ و شاره‌گه‌وره‌کانی ئێران ئیمکانی ڕابوون و ڕاپه‌رین به‌دی ده‌کرێ؛ بۆیه‌ رێگه‌چاره‌یان له‌ په‌ره‌پێدانی تۆڕی جاسووسی و ده‌زگاکانی "شنوود" و کونتڕۆلی ته‌له‌فوون و ئیتنێترنێت و به‌تایبه‌ت ته‌له‌فوونی موبیل دێتوه‌ته‌وه‌.

بۆیه‌ به‌پێویستمان زانی هاونیشتمانان و به‌تایبه‌ت لاوان و چالاکانی سیاسی و مه‌ده‌نی ئاگادار بکه‌ینه‌وه‌ که‌ ده‌بێ وریایی خۆیان زیاتر بکه‌ن و له‌ شێوه‌ی به‌کار گرتنی ئامێره‌کانی پێوه‌ندی وه‌ک ته‌له‌فوون، ته‌له‌فوونی موبیل و ئینتێرنێت و به‌تایبه‌ت ناردنی ئیس ئێم ئیس(SMS) وریابن. ئه‌م وریاییه‌ به‌تایبه‌ت له‌ کاتی پێوه‌ندی له‌گه‌ڵ ده‌ره‌وه‌ی وڵات ده‌بێ زۆرتر بێت. چالاکان و لاوان ده‌بێ له‌کاتی که‌ڵکوه‌رگرتن له‌م ئامێرانه‌، هه‌وڵ بده‌ن ته‌واوی بواره‌کانی ئه‌منیه‌تی له‌به‌رچاو بگرن.

زانیاریه‌‌ باوه‌ر پێکراوه‌کان ئه‌وه‌ ده‌سنیشان ده‌که‌ن که‌ ئینتێرنێت(به‌تایبه‌ت له‌ کافی نێته‌کان) و ته‌لفوونی موبیل و SMS به‌ توندی کونتڕۆڵ ده‌کرێن، مه‌به‌ستی حکوومه‌ت له‌م کارانه‌ی له‌ داو خستنی لاوان و چالاکانه‌ و ده‌یانه‌وێ به‌هه‌ر شێوه‌یه‌ک بووه‌ چه‌ند که‌سێک له‌ کوردستان وه‌ک جاسووسی بێگانه‌ بێننه‌ سه‌ر ته‌له‌فزیون و قسه‌کانی موحسنی ئێژه‌یی(وه‌زیری ئیتڵاعات) له‌مه‌ڕ "تۆڕه‌ جاسووسیه‌کانی ئامریکا و ئینگلیس"  وه‌ڕاست بگه‌ڕێنن.

بێگومان ئه‌م زانیاریانه‌ نابێت که‌ند و کۆسپ بخاته‌ سه‌ر ژیانی ئاسایی و تێکۆشانی چالاکان و لاوان و ئه‌م تێکۆشه‌رانه‌ وه‌ک تا ئێستا کردوویانه‌، رێگه‌ی پووچه‌ڵکردنه‌وه‌ و  به‌رپه‌رچ دانه‌وه‌ی سیاسه‌ته‌ سه‌رکوگه‌رانه‌کانی حکوومه‌ت به‌ ئاسانی ده‌بیننه‌وه.